Pune News : गेल्या सहा ते सात महिन्यांपासून आळंदीमध्ये इंद्रायणी नदी फेसाळत आहे. मध्यंतरी तत्कालिन मुख्यमंत्री आणि आताचे उपमुख्यमंत्री एकनाथ शिंदे यांनी इंद्रायणीच्या प्रदुषणावरून अधिकाऱ्यांना धारेवर धरले होते. तसेच नदी प्रदुषणमुक्त करण्याच्या सूचना केल्या होत्या. यानंतर काही प्रमाणात नदीचे फेसाळणे थांबले होते. पण पुन्हा आता नदी फेसाळल्याने वारकऱ्यांचे आरोग्य धोक्यात आले आहे. यामुळे आळंदीकर आणि वारकऱ्यांकडून नाराजी व्यक्त करण्यात येत आहे.

हिमालयातील बर्फ की इंद्रायणी?

इंद्रायणी नदीच्या प्रदुषणाचा प्रश्न ऐरणीवर आला असून पुन्हा एकदा इंद्रायणी फेसाळली आहे. आज देखील नदीच्या पाण्यावर पांढरा शुभ्र बर्फासारखा तवंग जमा झाला आहे. यामुळे बघ्यांकडून ही इंद्रायणी नदी आहे की हिमालयातील बर्फ असा सवाल उपस्थित केला जात आहे.

शिंदेंचे आश्वासन हवेतच विरले

२९ जून २०२४ रोजी अलंकापुरीत शिंदे यांनी पालखी सोहळ्याला हजेरी लावली होती. त्यावेळी त्यांनी राज्यातील वारकऱ्यांची आपल्याला काळजी असून इंद्रायणीच्या प्रदूषणाचा प्रश्न मार्गी लावू, असे आश्वासन दिले होते. मात्र या आश्वासनानंतर पहिल्याच २४ तासांत इंद्रायणी फेसाळली होती. ज्यानंतर महाराष्ट्र प्रदूषण नियंत्रण मंडळाच्या अधिकाऱ्यांनी पावले उचलल्याचा आव आणला होता. पण नदी वारंवार फेसाळत असल्याने नदीची अवस्था जैसे थे असल्याचं पाहायला मिळत आहे.

तर शिंदे यांची भेट आणि त्यांचे आश्वासन फक्त वेळ मारून नेण्यासाठी होती का? प्रशासनान फक्त आदेश मानून तात्पूरती मलमपट्टी तर कर नाही ना? असे सवाल आता आळंदीकर आणि वारकऱ्यांकडून केला जात आहे.

वारकऱ्यांचं आरोग्य धोक्यात

आळंदीकर आणि वारकऱ्यांकडून इंद्रायणी नदीत पवित्र स्नान केले जाते. पण गेल्या कित्येक महिन्यापासून इंद्रायणीत प्रदुषण होत आहे. यावरून इंद्रायणी नदी काठावर आंदोलने देखील झाली आहे. मात्र आता इंद्रायणी प्रदूषणाचा मुद्दा ऐरणीवर आला असून वारकऱ्यांच आरोग्य धोक्यात आले आहे.