Nagpur News : ‘‘कृषी अभ्यासक्रमाला प्रवेशित विद्यार्थ्यांना प्रक्रियाजन्य पदार्थांचे उत्पादन, विक्रीबाबत कळल्यास त्यातून भविष्यात कृषी उद्योजक घडतील. त्यामुळे विद्यार्थीदशेतच त्यांना पुस्तकी ज्ञानासोबतच उद्यमशीलतेचे धडे देण्याची गरज आहे,’’ असे मत कुलगुरू डॉ. शरद गडाख यांनी व्यक्‍त केले.

नागपूर कृषी महाविद्यालया अंतर्गत सहयोगी अधिष्ठाता डॉ. प्रकाश कडू यांच्या पुढाकाराने डेअरी विभागात विविध उत्पादन व उत्पन्नक्षम प्रकल्पांची उभारणी करण्यात आली आहे. शुक्रवारी (ता. २४) डॉ. गडाख यांच्या हस्ते या प्रकल्पाचे लोकार्पण झाले.

डॉ. गडाख म्हणाले, ‘‘नागपूर कृषी महाविद्यालयाने शेळी, कुक्‍कुटपालन, हायड्रोफोनिक्‍स चारा उत्पादन, विक्री केंद्र, कंपोस्ट, ऍझोला उत्पादन असे विविध उपक्रम राबविण्यावर भर दिला आहे. उत्पन्नवाढीचा हा सक्षम स्रोत ठरेल. त्यांच्याच अनुकरणातून विद्यापीठा अंतर्गत असलेल्या इतरही कृषी महाविद्यालयांनी अशा उपक्रमांसाठी पुढे यावे.

विद्यापीठा अंतर्गतच्या डेअरी विभागासह इतरही १८ विभागांनी विद्यार्थ्यांसाठी अशा शिका आणि कमवा संकल्पनेवर काम करण्याची गरज आहे. याद्वारे विद्यार्थ्यांना उत्पादन ते विक्रीपर्यंतचे धडे मिळतील व त्यातून भविष्यात कृषी उद्योजक घडण्यास मदत होतील.’’

डेअरी विभागाचे प्रमुख विलास अतकरे यांनी या ठिकाणी १० ते १२ वरून ३५ वर शेळ्या नेल्या आहेत. पोल्ट्री शेडमध्ये ४०० कोंबड्या आहेत. त्यासोबतच दुग्धजन्य पदार्थांचे उत्पादन व विक्रीसाठी देखील त्यांनी घेतलेल्या पुढाकाराबद्दल कुलगुरूंनी या वेळी त्यांचे कौतुक केले.