Malegaon News : विधानसभा सार्वत्रिक निवडणुकीच्या पार्श्वभूमीवर नवीन मतदारांची नावे नोंदविण्यासाठी सप्टेंबरमध्ये नावनोंदणीची संधी देण्यात आली होती. ऑनलाइन नावनोंदणी करणाऱ्या मतदारांच्या नावांचा समावेश विधानसभेच्या पुरवणी मतदार यादीत करण्यात आला आहे.

निवडणूक आयोगाच्या अंतिम पुरवणीनुसार, मालेगाव बाह्य विधानसभा मतदारसंघात ३ लाख ८० हजार ५७६, तर मध्य मतदारसंघात ३ लाख ४२ हजार ७१३ मतदार आहेत. ३० ऑगस्ट २०२४ रोजी प्रसिद्ध झालेल्या याद्यांच्या तुलनेत मालेगाव मध्यमध्ये २ हजार ८९० व मालेगाव बाह्यमध्ये ६ हजार ५८९ नवीन मतदारांची वाढ झाली आहे. नवीन मतदारांची नोंदणी करणे, दुबार व मृत नावे वगळण्याची प्रक्रिया राबविण्यात आली.

प्रारूप याद्यांवरील हरकती निकाली काढून ३० ऑगस्टला अंतिम यादी जाहीर झाली. मालेगाव बाह्य विधानसभा मतदारसंघात ३ लाख ७३ हजार ९८७, तर मध्यमध्ये ३ लाख १३ हजार ६८ मतदार होते. मात्र, संपूर्ण सप्टेंबर महिन्यात नवीन मतदारांना नाव नोंदणीची संधी देण्यात आली होती.

त्यानुसार ऑनलाइन नावनोंदणी करणाऱ्या मतदारांच्या नावांचा समावेश विधानसभेच्या पुरवणी मतदार यादीत करण्यात आला आहे.

पुरवणी मतदार यादीनुसार मालेगाव मध्य मधून ३ लाख ४२ हजार ७१३, तर मालेगाव बाह्य मध्ये ३ लाख ८० हजार ५७६ मतदार आपला मतदानाचा हक्क बजावतील, अशी मालेगाव मध्यचे निवडणूक निर्णय अधिकारी नितीन सदगीर व मालेगाव बाह्यच्या निवडणूक निर्णय अधिकारी पल्लवी निर्मळ यांनी दिली.