Solapur News : आता तलाठ्याऐवजी ई-पीक पाहणी ॲपद्वारे पिकांची नोंद केली जात आहे. नैसर्गिक आपत्तीमुळे होणाऱ्या नुकसानीनंतर सरकारी मदतीसाठी ॲपवर पीक नोंदणी बंधनकारक आहे. मात्र, हत्तुर (ता. दक्षिण सोलापूर) येथील शेतकरी नोंदणीसाठी शेतात गेल्यावर ॲप आपण शेतापासून दूर असल्याचे सांगत आहे. त्यामुळे शेतकरी त्रस्त झाले आहेत.

दोन दिवस उसंत घेतलेल्या पावसाने पुन्हा गुरुवारी हजेरी लावली आहे. खरिपातील पिकांची काढणी, रास यासाठी धावपळ सुरू आहे. त्यात गावागावात ई-पीक पाहणी ॲपवर नोंदणीसाठीही त्यांची धडपड सुरू आहे. अनेक शेतकऱ्यांना याबद्दल पुरेशी माहिती नसली तरी कोणाला तरी गळ घालून ॲपवर नोंदणीसाठी प्रयत्न करीत आहेत.

कारण यंदा सततच्या पावसाने पिकांचे नुकसान झाले आहे. खरिपातील पिकांचे नुकसान झाल्यास दिलासा मिळेल, या भरवशाने आधीच शेतकऱ्यांनी पीकविमा अर्ज भरून पिके विमा संरक्षित केली आहेत.

मात्र, त्यासाठी पीक पाहणी नोंदणीही बंधनकारक आहे. नोंदणी न केल्यास त्यांना विम्यासह सरकारी मदतीपासून वंचित राहावे लागणार आहे. हत्तुर येथे शेतात गेल्यावर ॲप आपण शेतापासून दूर असल्याचे सांगत आहे. विशेषतः ते त्यांच्या शेतापासून अडीच-तीन हजार मीटर दूर असल्याचे दाखवू लागल्याने शेतकरी चक्रावून गेले आहेत.