Chhatrapati Sambhajinagar Rain News : मान्सून ने आपली व्याप्ती सर्वदूर वाढवली असल्याचा मराठवाड्यातील छत्रपती संभाजीनगर, जालना, बीड, उस्मानाबाद व लातूर जिल्ह्यातील अनेक भागात अजूनही पावसाची हजेरी तुरळक, हलकीच आहे.

मराठवाड्यातील छत्रपती संभाजीनगर, जालना, बीड, उस्मानाबाद व लातूर या पाचही जिल्ह्यात रविवारी (ता. २५) सकाळपर्यंतच्या २४ तासात काही मंडळ वगळता अनेक मंडळात हलकी मध्यम दमदार हजेरी लावणारा पाऊस आता सक्रिय होतो असे वाटत होते.

परंतु, सोमवारी (ता. २६) सकाळपर्यंतच्या २४ तासात पावसाची हजेरी एक-दोन ठिकाणचा अपवाद वगळता तुरळक, हलकीच राहिली. सोमवारी सकाळपर्यंतच्या चोवीस तासात छत्रपती संभाजीनगर जिल्ह्यातील ३५ मंडळात तुरळक हलका पाऊस झाला.

जालना जिल्ह्यातील १४ मंडळातही पावसाची हजेरी तुरळक राहिली. बीड जिल्ह्यातील ५०, लातूर मधील २८ व धाराशिव जिल्ह्यातील ४२ मंडळातही पावसाची हजेरी बहुअंशी तुरळक व काही ठिकाणी हलक्या स्वरूपाची राहिली.

त्यामुळे ज्या ठिकाणी मध्यम ते थोडा दमदार पाऊस झाला. त्या ठिकाणी शेतकऱ्यांनी पेरणीची गती वाढवली आहे. परंतु तुरळक, हलका पाऊस झालेल्या भागात मात्र अजूनही शेतकऱ्यांनी पेरणीला पसंती दिली नसल्याचे चित्र आहे. अशा भागात अजूनही शेतकऱ्यांना जोरदार पावसाची प्रतीक्षा आहे.

सोमवारी दुपारी एक ते तीन वाजेदरम्यान जालना जिल्ह्यातील धारकल्याण ते जालना व जालना ते बदनापूर दरम्यान अनेक भागात काही ठिकाणी मध्यम तर काही ठिकाणी त्यापेक्षा थोडा जास्त पाऊस झाला. अंबड शहर परिसरातही दुपारी दोनच्या सुमारास पावसाला सुरुवात झाली होती.

घनसावंगी परिसरात दिवसभर ढगाळ वातावरण व दुपारी तीनच्या सुमारास मध्यम पाऊस झाला. लातूर जिल्ह्यातील निलंगा परिसरात अधून मधून पावसाच्या सरी पडत होत्या.

छत्रपती संभाजीनगर जिल्ह्यात कन्नड तालुक्यातील चापानेर परिसरात सकाळी साडेअकरा वाजताच्या सुमारास अर्धा तास रिमझिम पाऊस पडत होता. बीड जिल्ह्यातील किल्ले धारूर परिसरात सकाळपासून पावसाची उघडझाप करीत भुरभुर सुरू होती.