Chhatrapati Sambhaji Nagar News : मराठवाड्यातील छत्रपती संभाजीनगर, जालना, बीड, धाराशिव व लातूर या पाच जिल्ह्यांतील २६५ मंडलांमध्ये बुधवारी (ता. २७) सकाळपर्यंतच्या २४ तासांत पावसाने हजेरी लावली. बहुतांश मंडलांत पावसाचा जोर कमीच राहिला. छत्रपती संभाजीनगर जिल्ह्यातील एकमेव पाचोड मंडलात ७३ मिलिमीटर पाऊस झाला. इतर मंडलांमध्ये तुरळक, हलका पाऊस झाला.

छत्रपती संभाजीनगर जिल्ह्यातील सर्व ८४ मंडलांत हलका ते मध्यम पाऊस झाला. जिल्ह्यातील २३ मंडलांत २० ते ५८ मिलिमीटर पाऊस झाला. पैठण तालुक्यातील पाचोड मंडलात अतिवृष्टी झाली. छत्रपती संभाजीनगर तालुक्यात सरासरी २६.२ मिलिमीटर, पैठणमध्ये सरासरी २८.९, गंगापूरमध्ये सरासरी २०.७ मिलिमीटर पाऊस झाला.

जालना जिल्ह्यातील ४९ मंडलांत हलका, मध्यम तर काही मंडलांत दमदार पाऊस झाला. जिल्ह्यातील ११ मंडलांत २० ते ४८ मिलिमीटर पाऊस झाला. जाफराबाद तालुक्यात सरासरी ३१.३ मिलिमीटर, परतुरमध्ये सरासरी २२.८ मिलिमीटर पाऊस झाला.

बीड जिल्ह्यातील ६३ पैकी ४७ मंडलांत पाऊस झाला. बहुतांश मंडलांत हलका पाऊस झाला. ७ मंडलांत २० ते ३१.५ मिलिमीटर पाऊस झाला. लातूर जिल्ह्यातील ६० पैकी ५० मंडलांत पाऊस झाला. रेणापूर तालुक्याकडे पावसाने पाठ फिरविली.

धाराशिव जिल्ह्यातही ४२ पैकी केवळ ३५ मंडलांत हलका पाऊस झाला. ८ मंडलांत १५ ते ४१ मिलिमीटर पाऊस झाला. इतर तालुक्यांच्या तुलनेत उमरगा तालुक्यात पावसाचा जोर थोडा अधिक राहिला.

जिल्हानिहाय पाऊस झालेली मंडले (मिलिमीटरमध्ये)

छत्रपती संभाजीनगर ः चिखलठाणा ४२.८, चित्तेपिंपळगाव ३४.५, करमाड ३४.५, हर्सूल ५७.५, कचनेर ४२.३, वरुडकाजी ४०.५, बालानगर ५७.८, गंगापूर ३७, भेंडाळा ४०.५, शेंदूरवादा ३१.५, जामगाव ३४, नागद ५१, गोळेगाव ३७.

जालना ः जाफराबाद ३०.३, कुंभारझरी ४८.५, वरुड ४८.३, वाघरूळ ३४.५, आष्टी ३१.८, सातोना ३८.८

बीड ः कडा ३१.८, तालखेड ३१.५.

लातूर ः लातूर २८.८, बाभळगाव २८.८, हरंगुळ २८.८

धाराशिव ः धाराशिव ग्रामीण ४१.३, उमरगा ३४.३, डाळिंब २९.३, मुळज ३३.३, मुरूम २४.३.