Nashik News : नाशिक : सुरगाणा तालुक्यातील सिंचन विहीर बांधण्याचे प्रकरण मंजूर करण्याच्या मोबदल्यात ५ हजार रुपयांची लाच घेणाऱ्या तत्कालीन ग्रामसेवकास न्यायालयाने एक वर्ष कारावास व दहा हजार रुपयांच्या दंडाची शिक्षा ठोठावली आहे.

मनोहर जगन्नाथ हिरे (रा. सुरगाणा) असे लाचखोर ग्रामसेवकाचे नाव असून, हा प्रकार लाचेची घटना डिसेंबर २०१६ मध्ये घडली होती.

तक्रारदार धनराज लक्ष्मण भोये यांची वडिलोपार्जित शेतजमीन असून, त्यांनी महात्मा गांधी ग्रामीण रोजगार हमी योजनेअंतर्गत सिंचन विहीर बांधण्यासाठीचा प्रस्ताव सादर केला होता.

हा प्रस्ताव मंजुरीसाठी वरिष्ठांकडे पाठविण्याच्या मोबदल्यात तत्कालीन ग्रामसेवक हिरे याने ५ हजार रुपयांच्या लाचेची मागणी केली होती.

भोये यांनी लाचलुचपत प्रतिबंधक विभागाकडे तक्रार केली होती. त्यानुसार पथकाने १९ डिसेंबर २०१६ रोजी सुरगाणा पंचायत समितीच्या कार्यालयाबाहेर सापळा रचला आणि लाचखोर हिरे यास लाचेची रक्कम घेताना रंगेहाथ पकडले होते.

याप्रकरणी सुरगाणा पोलिसात गुन्हा दाखल करून पोलिसांनी तपास करीत न्यायालयात दोषारोपपत्र दाखल केले. सरकारी पक्षातर्फे ॲड. सुधीर कोतवाल यांनी युक्तिवाद केला. त्यात त्यांनी तीन साक्षीदार तपासले.

गुन्हा झाल्याने जिल्हा व सत्र न्यायाधीश नितीन जिवणे यांनी हिरे यास शिक्षा सुनावली.या प्रकरणात लाचलुचपत प्रतिबंधक विभागातर्फे प्रदीप काळोगे व ज्योती पाटील यांनी तपास व पाठपुरावा केला.