Jalgaon News : जिल्ह्यात हवामानावर आधारित फळ पीकविमा योजनेत यंदा सुमारे ६२ हजार शेतकऱ्यांनी केळी पिकासंबंधी विमा सरक्षण घेतले आहे. यात विमा कंपनीच्या प्रतिनिधींकडून विमाधारकांनी केळी पीक पडताळणी किंवा शेतात केळीची जिओ टॅगिंग करून घेणे आवश्यक आहे.

जिओ टॅगिंगला प्रतिसाद न दिल्यास किंवा केळीची जिओ टॅगिंग न केल्यास सबंधित विमाधारकाचा योजनेतील सहभाग रद्द केला जाणार असल्याचे विमा कंपनीने सांगितले.

केळी पिकासाठी फळ पीकविमा योजनेतून आंबिया बहर अंतर्गत १ ते ३१ ऑक्टोबर २०२४ पर्यंत विमा अर्ज पोर्टलवर किंवा ऑनलाइन सादर करण्यात आले.

हे अर्ज सादर करताना विमाधारकांनी केळी लागवडीसंबंधीचे जिओ टॅगिंग केलेले छायाचित्र, सात-बारा उतारा व हेक्टरी साडेआठ हजार रुपये विमा हप्ता विमा कंपनीकडे दिला आहे. या योजनेत सहभागी झालेल्या शेतकऱ्यांच्या केळी पीक लागवडीसंबंधीची माहिती किंवा पीक पडताळणी विमा कंपनी करीत आहे.

त्यासाठी विमा कंपनीचे प्रतिनिधी संबंधित गावांत जाऊन गतीने कार्यवाही करीत आहेत. या योजनेत फक्त ज्यांनी शेतात केळीची निर्देशीत क्षेत्रात नमूद केल्याएवढी लागवड केली, त्यांचाच सहभाग कायम ठेवला जाणार आहे. केळी पिकाचे जिओ टॅगिंग करून घ्यावे, असे आवाहन कंपनीने केले.