Chh. Sambhajinagar News : हिमायतबाग फळ संशोधन केंद्राच्या मालकीच्या जमिनीवरील अतिक्रमण काढून त्यात लागवड केलेल्या पेरू बागेतील फळांचा नुकताच (ता. १० रोजी) लिलाव केला गेला. त्यामुळे आजवर हजारोंत जाणारा हा लिलाव यंदा पहिल्यांदाच दीड लाखाच्या पुढे गेला.

यासंदर्भात माहिती देताना हिमायतबाग फळ संशोधन केंद्राचे प्रभारी अधिकारी डॉ. संजय पाटील म्हणाले, की हिमायतबाग फळ संशोधन केंद्राच्या सर्वे क्रमांक २२ मधील ७ एकर ५ आर जमिनीवर केंद्राच्या स्थापनेपासून अतिक्रमण करण्यात आले होते. आपण हिमायतबाग केंद्राचा प्रभारी अधिकारीपदाचा पदभार घेतल्यानंतर भूमी अभिलेख विभागामार्फत तातडीची मोजणी करून सर्वे नंबरची जमीन पोलीस संरक्षणात ताब्यात घेत हद्द निश्चिती करून सिमेंट पोल लावले. या अतिक्रमित जागेवर अतिक्रमणधारक विविध पिके घ्यायचे.

या जागेतील पेरू झाडे व बागेतील पेरू झाडांचा लिलाव एकत्र केल्याने महसूलवाढीचा फायदा केंद्रास होऊन महसूल प्राप्त झाला. यानंतर बाकी क्षेत्रावर सीताफळ लागवडीचे नियोजन करण्यात आले आहे. या लिलाव प्रक्रियेत ९ व्यापाऱ्यांनी सहभाग नोंदविला. या लिलावासाठी डॉ. रवींद्र नैनवाड, डॉ. विजय सावंत, डॉ. गिरीश सोनवणे, डॉ. सदाशिव अडकिने, राजू सोनवणे, महंमद इसाक, शाहेबाझ, अनिल बखळे आदींची उपस्थिती होती.

अतिक्रमित जागेतील सुमारे १९५ झाडांसह एकूण ५७९ पेरू झाडांचा या वेळी लिलाव करण्यात आला. मागील वर्षी लिलावातून ६० हजार रुपयेच रक्कम मिळाली होती. यंदा मात्र पेरू बागेचा लिलाव १ लाख ५९ हजार रुपयांना गेला. अतिक्रमण हटविण्यासाठी महसूल विभागासह पोलीस विभागाचे मोठे सहकार्य मिळाल्याचे डॉ. पाटील म्हणाले.