Chh. Sambhajinagar News : अति घन केसर आंबा लागवडीतूनच कमी मजुरांमध्ये तिसऱ्याच वर्षी आणि अगदी एप्रिलच्या सुरवातीलाच माल काढायला येणे शक्य होत असल्याने शेतकऱ्यांना मोठ्या प्रमाणात आर्थिक फायदा होतो, असे मत महाकेसर आंबा बागायतदार संघाचे उपाध्यक्ष तथा गट शेतीचे प्रणेते डॉ. भगवानराव कापसे यांनी व्यक्त केले.

ॲग्रो इंडिया गट शेती संघाचा 242 वा गट शेती शेतकरी सुसंवाद मेळावा खांडी पिंपळगाव (ता. खुलताबाद येथे नाशिकचे शिक्षण उपसंचालक बी. बी. चव्हाण यांच्या आधुनिक पद्धतीने उभारलेल्या अति घन लागवड आंबा बागेत शिवार फेरी करून झाला. यावेळी डॉ. कापसे यांनी सादरीकरणातून आंबा अतिघन लागवडीतुन निर्यात योग्य उत्पादन कसे घेता येईल, याविषयी सविस्तर मार्गदर्शन केले.

डॉ. कापसे म्हणाले, की अतिघण लागवडीच्या बागेतून एप्रिलच्या सुरुवातीसच माल काढणीस येतो. इंग्लंड, अमेरिका, जपान या आंतरराष्ट्रीय मार्केटमध्ये आपला माल फार मोठ्या प्रमाणात निर्यात होतो. शेतकरी जर गट पद्धतीने अति घन आंबा लागवड मोठ्या प्रमाणात करण्यास तयार असतील तर सावित्रीबाई फुले एनजीओ बरोबर आपणही या भागातील शेतकऱ्यांना पुढील तंत्रज्ञान देण्यास तयार आहोत, असे सांगितले.

यावेळी मोहोरातील नर व संयुक्त फुलांची ओळख, भुरी रोगाची तसेच मोहरावर येणाऱ्या विविध किडींची सविस्तर माहिती देऊन या मोहराचे संरक्षण, फळाचा आकार वाढवणे दर्जा राखणे, निर्यात आदी विषयी मार्गदर्शन केले. श्री. चव्हाण म्हणाले, की डॉ. कापसे यांच्या मार्गदर्शनाखाली या बागेतून एकरी साधारणतः चार ते साडेचार टन माल मिळण्याचा अंदाज अंदाज आहे.

जिल्हा विकास यंत्रणेचे प्रोजेक्ट डायरेक्टर अशोक शिरसे यांनीही त्यांच्या बागेविषयी माहिती दिली. यावेळी आंबा बागायतदार उमेश शिंदे यांनी आपले अनुभव कथन केले. तर कापूस तज्ज्ञ डॉ. बैनाडे यांनी कापसाविषयी थोडक्यात तांत्रिक माहिती दिली. कार्यक्रमास ॲग्रो इंडियाचे प्रमुख श्री. लक्ष्मण सवडे, श्री गायके, भगवान बनकर तसेच परिसरातील शेतकरी उपस्थित होते.