Pune News : कोकण, घाटमाथ्यावर पावसाचा जोर कायम आहे. मागील चार ते पाच दिवसांपासून या भागात पावसाची संततधार सुरूच आहे. कोकणातील रायगड, रत्नागिरी, सिंधुदुर्ग, ठाणे जिल्ह्यांत पावसाच्या जोरदार सरी कोसळत आहेत. पश्‍चिम महाराष्ट्रातील पुणे, सातारा, कोल्हापूर जिल्ह्याच्या पश्चिम भागात हलका ते मध्यम पाऊस पडला. या पावसामुळे भात रोपे तरारली आहेत.

सध्या पावसासाठी पोषक वातावरण आहे. घाटमाथ्यासह धरणक्षेत्रात जोरदार पाऊस पडत आहे. रविवारी (ता.३०) सकाळी आठ वाजेपर्यंत लोणावळा धरण क्षेत्रात सर्वाधिक १६३, तर कोयना (नवजा) धरणक्षेत्रात १०० मिलिमीटर पाऊस पडला.

अंबोणे धरणक्षेत्रात ६८ मिलिमीटर, शिरगाव ३७, कोयना (पोपळी) ३९, दावडी ४७, तर डुंगरवाडी परिसरात ४२ मिलिमीटर पाऊस झाला. भातसा घाटमाथ्यावर ५५ मिलिमीटर पाऊस पडला. यामुळे धरणांतील पाणीपातळीत हळूहळू वाढ होऊ लागली आहे.

कोकणातील रायगड, सिंधुदुर्ग जिल्ह्यात पावसाचा जोर अधिक होता. सिंधुदूर्गमधील अंबोली मंडलात सर्वाधिक ७३.५, कणकवली मंडलात ७२.०, तर फोंडा येथे ७०.५ मिलिमीटर पाऊस पडला. रायगडमधील आंबेलोली आणि पालगड मंडलात ५४.५, तर रत्नागिरीतील पुनस मंडलात ६९.३ मिलिमीटर पाऊस पडला.

पश्चिम महाराष्ट्रात हलक्या सरी बरसत आहेत. पुणे जिल्ह्यातील वेल्हा मंडलात ६४.३ मिलिमीटर पाऊस पडला. तर भोर, मावळ, मुळशी तालुक्यांतही हलका पाऊस झाला. साताऱ्यातील महाबळेश्‍वर मंडलात ७०.८ मिलिमीटर, तर तापोळा मंडलात ५८.३ मिलिमीटर पाऊस पडला. कोल्हापुरातील बांबवडे मंडलात ६०, तर आंबा मंडलात ६६.३ मिलिमीटर पाऊस पडला. मराठवाडा व विदर्भातही तुरळक ठिकाणी हलक्या सरी पडल्या.

रविवारी (ता. ३०) सकाळी आठ वाजेपर्यंतचा मंडलनिहाय पाऊस : स्त्रोत - कृषी विभाग

कोकण : वाकवली ५०.५, खेड ५०.५, भरणे ५१.०, ५४.५, देव्हळे ५०.८, लांजा ५४.५, पुनस ६९.३, विलवडे ५०.३, बांदा ६२.०, सांगवे ५७.०, भेडशी ५१.५.