Chhatrapati Sambbhajinagar News : मराठवाड्यातील जालना, बीड, छत्रपती संभाजीनगरमध्ये मंगळवारी (ता. ११) सकाळपर्यंतच्या २४ तासांत पुन्हा एकदा पावसाचा जोर पाहायला मिळाला. जालना जिल्ह्यात पावसाचा जोर सर्वाधिक राहिला.

त्यापाठोपाठ बीड, छत्रपती संभाजीनगरमध्ये अपवाद वगळता पावसाची हलका, मध्यम ते जोरदार हजेरी लागली. जालना जिल्ह्यातील सर्व ४९ मंडलांत पाऊस झाला. त्यापैकी दहा मंडलांत अतिवृष्टी झाली.

बीड जिल्ह्यातील ६३ पैकी ४९ मंडलांत पावसाची हलकी, मध्यम ते दमदार हजेरी लागली. अंबाजोगाईत पावसाचा जोर सर्वाधिक राहिला. या तालुक्यात सरासरी ६०.९ मिलिमीटर पाऊस झाला. धारूर, परळी, माजलगाव, गेवराई, आष्टी, शिरूर कासार, असा क्रमाने पाऊस कमी अधिक प्रमाणात झाला.

छत्रपती संभाजीनगर जिल्ह्यातील ८३ पैकी ७१ मंडलांत तुरळक, हलका, मध्यम ते दमदार पाऊस झाला. जिल्ह्यातील तीन मंडलांत अतिवृष्टी झाली. जोरदार अतिजोरदार पावसामुळे काही भागात नदी नाले एक झाल्याचे पाहायला मिळाले.

अतिवृष्टीची मंडले (पाऊस मिलिमीटरमध्ये)

जालना जिल्हा ः राजूर ७०.३, केदारखेडा ७०, वाघरुळ ६५.३, परतूर ६६.८, वाटूर १०५.५, बावणे पांगरी ६८, घनसावंगी १०७.३, कुंभार पिंपळगाव ८०.५, तळणी ७८, ढोकसाल ९३.

बीड जिल्हा ः अंबाजोगाई ७१.५, घाटनांदूर ६६, धर्मापुरी ८१, मोहखेड ९१.३.

छत्रपती संभाजीनगर ः बालानगर १००.८, कचनेर ६७.५, ढोरकिन ६९.३.