Pune News : राज्यातील विविध जिल्ह्यांमध्ये सोमवारी (२६ रोजी) रात्री जोरदार पाऊस आणि गारपीट झाली. याचा रब्बी पिकांना फटका बसला असून फळबागांचेही मोठे नुकसान झाले आहे. तर आज हवामान विभागाने नागपूरला ऑरेंज अलर्ट जारी केला आहे. यामुळे पुन्हा एकदा विदर्भातील शेतकरी आस्मानी संकंटात सापडला आहे. शेतकऱ्यांमध्ये चिंतेचे वातावरण पसरले आहे.

हवामान विभागाने वर्तवलेल्या अंदाजानुसार विदर्भासह खानदेशात सोमवारी रात्री जोरदार पाऊस आणि गारपीट झाली. अचानकच्या आलेल्या अवकाळी पाऊस आणि गारपिटीमुळे काढणीला आलेल्या गव्हासह रब्बी हंगामातील पिक आणि फळबागांचेही नुकसान झाले आहे. यामुळे शेतकरी संकटात सापडला आहे.

तात्काळ मदत मिळणार

दरम्यान आज मांडण्यात येणाऱ्या अंतरिम अर्थसंकल्पाच्या आधी विरोधकांनी विधानभवनाच्या पायऱ्यांवर आंदोलन सुरु केले. त्यांनी अवकाळी पाऊस, गारपीट आणि वादळी वाऱ्यामुळे बाधित झालेल्या शेतकऱ्यांच्या पिके आणि फळबागांच्या नुकसानीपोटी भरीव तरतूद करावी अशी मागणी लावून धरली आहे. यावेळी उपमुख्यमंत्री देवेंद्र फडणवीस यांनी सोमवारी झालेल्या गारपिटीमुळे शेतकऱ्यांचे मोठे नुकसान झाल्यावरून वक्तव्य केले आहे. फडणवीसांनी याप्रकरणी गारपीटग्रस्त शेतकऱ्यांना तात्काळ मदत देण्यात येईल अशी माहिती विधानभवनात दिली आहे.

बुलढाण्यातील रस्ता बर्फाने झाकला

बुलढाणा जिल्ह्यात मेघगर्जना आणि वादळी वाऱ्यासह पावसाने हजेरी लावल्यामुळे शेतासह रस्तेही गारांनी झाकले गेले. तर काढणीला आलेल्या गव्हाचे नुकसान झाले असून चिकूच्या बांगाना फटका बसला आहे. तसेच गारांचा पाऊस झाल्याने चिखली देऊळगावराजा रोडला बर्फाचे स्वरूप आले होते.

वादळी वाऱ्यासह गारपिटीने झोडपले

मेघगर्जना आणि वादळी वाऱ्याने बुलढाण्यातील रस्ते बर्फाने झाकले गेले होते. तर जळगाव तालुक्यात विजांच्या कडकडाटासह मुसळधार पाऊस झाला. यावेळी चाळीसगाव तालुक्यातील अनेक गावांना सुमारे वीस ते पंचवीस मिनिटे वादळी वाऱ्यासह गारपिटीने झोडपून काढले.

अकोल्यात विद्युत पुरवठा खंडीत

हवामान विभागाने २६ ते २८ फेब्रुवारी दरम्यान राज्यात गारपीट होण्याचा अंदाज वर्तवला होता. तसेच विदर्भातील सर्व जिल्ह्यांना यलो अलर्ट दिला होता. त्याप्रमाणे अकोल्यात झालेल्या विजांच्या कडकडासह जोरदार पावसामुळे अनेक ठिकाणी विद्युत पुरवठा खंडीत झाला.

द्राक्षबागा भुईसपाट

सोलापूर जिल्ह्याच्या बार्शीत तालुक्यात अचानक झालेल्या वादळी वाऱ्यासह गारपिटीमुळे द्राक्षबाग भुईसपाट झाल्या. यामुळे द्राक्ष उत्पादक शेतकऱ्यांचे लाखोंचे नुकसान झाले आहे.

शेतीचे नुकसान

हवामान विभागाने २६ ते २८ फेब्रुवारी दरम्यान विदर्भातील सर्व जिल्ह्यांना यलो अलर्ट दिला होता. त्याप्रमाणे विदर्भातील अनेक जिल्ह्यात वादळ, गारपीट अवकाळी पाऊस झाला. यामुळे शेतीचे मोठ्या प्रमाणात नुकसान झाले आहे. अनेक ठिकाणी कांदा, मका, ज्वारी, बाजरी, हरभरा या रब्बी पिकांसह फळबागा जमीनदोस्त झाल्या.

'या' जिल्ह्यांना अलर्ट

हवामान विभागाने २६ ते २८ फेब्रुवारी दरम्यान विदर्भातील सर्व जिल्ह्यांना यलो अलर्ट दिला आहे. त्याप्रमाणे विदर्भातील अनेक जिल्ह्यात अवकाळी पाऊस झाला आहे. त्याचबरोबर आज २७ फेब्रुवारी रोजी वर्धा, अमरावती, नागपूर, गोंदिया, भंडारा या जिल्ह्यांना अलर्ट देण्यात आला आहे. तर अमरावती, नागपूर, गोंदिया, भंडारा या जिल्ह्यांना २८ फेब्रुवारी रोजी यलो अलर्ट देण्यात आला आहे.