Nagar News : जिल्ह्यात सोमवारी (ता.१५) दुपारनंतर सुरू झालेला पाऊस रात्री उशिरापर्यंत सुरू होता. त्यामुळे जिल्ह्यातील बहुतांश भागात खरिपाच्या पिकांना दिलासा मिळाला आहे. पन्नास महसूल मंडलांत दमदार पाऊस झालेला असून तीन मंडलांत अतिवृष्टीची नोंद झाली.

नगर जिल्ह्यात सुरुवातीला चांगला पाऊस झाल्यानंतर मध्यंतरीच्या काळात पावसाने काहीशी दडी मारली होती. त्यामुळे खरिपाच्या पिकांना अडचण झाली होती. दोन दिवसांपासून पुन्हा जिल्ह्यात पाऊस पडत आहे. सोमवारी दुपारनंतर संततधार पावसाला सुरुवात झाली.

सायंकाळी उशिरा अनेक भागांत जोरदार सुरुवात झाली. सोमवारच्या पावसाने नगर, पारनेर, कर्जत, जामखेड, श्रीगोंदा,संगमनेर, अकोले, कोपरगाव, श्रीरामपूर आदी भागांतील खरीप पिकांना जीवदान मिळाले आहे.

कर्जत, केडगाव आणि वांबोरी या महसूल मंडलांत अतिवृष्टीची नोंद झाली असून सुमारे पन्नास महसूल मंडलांत जोरदार पाऊस झाला आहे. अकोले तालुक्याच्या पश्चिम भागातही रतनवाडी, पांजरे, घाटघर, भंडारदरा, वाकी आदी भागांत जोरदार पाऊस सुरू असून भंडारदरा धरणाच्या पाणीसाठ्यात झपाट्याने वाढ होत आहे.

मंगळवार (ता.१६) सकाळी आठ वाजेपर्यंतचा पाऊस (मिलिमीटरमध्ये) ः

नालेगाव ः ३४, सावेडी ः २६, कापूरवाडी ः ४३, केडगाव ः १०१, भिंगार ः ४० ,नागापूर ः ३७, जेऊर ः ३१, चिचोंडी ः ५८, वाळकी ः २७, चास ः ५२, रुईछत्तीशी ः ३०, भाळवणी ः ३३, सुपा ः ११, वाडेगव्हाण ः ३२, मांडवगण ः २५, बेलवंडी ः ३२, कोळगावः ५९, कर्जत ः १००, राशीन ः ३९, भांबोरा ः ४६, कोंभळी ः ३०, मिरजगाव ः २३, माही ः २२, जामखेड ः ३०, आरणगाव ः१९, खर्डा ः ४९, नान्नज ः ३०, नायगाव ः ३०, बोधेगाव ः २६, पाथर्डी ः ४३ माणिकदौंडी ः२३, करंजी ः ३९, मिरी ः ४९, चांदा ः ३२, घोडेगाव ः२९, राहुरी ः ३०, सात्रळ ः ३६, टाकळीमिया ः ३७, ब्राह्मणी ः २७, वांबोरी ः ६७, आश्वी ः २५, सिबलापुर ः २५, तळेगाव ः २२, घारगाव ः २६, डोळासणे ः २६, साकूर ः ४५, पिंपरणे ः २४, पोहेगाव ः २९, लोणी ः ३९.