Nashik News : जिल्ह्यात ३ जुलैपर्यंत मध्यम पावसाचा तर घाट क्षेत्रातील काही ठिकाणी सोमवारी (ता.१ जुलै) जोरदार पावसाची दाट शक्यता वर्तविली आहे. तसेच हवामान दमट राहील व आकाश पुढील पाच दिवस ढगाळ राहील, असा अंदाज व इशारा भारतीय हवामान केंद्राच्या मुंबई प्रादेशिक कार्यालयाने दिला आहे. कमाल तापमान ३०-३२ व किमान तापमान २४-२५ अंश सेल्सिअस दरम्यान राहण्याची शक्यता आहे. तसेच वाऱ्याचा वेग १७-२८ कि.मी./तास या दरम्यान राहण्याची शक्यता आहे.

हवामानाचा अंदाजानुसार पशुधन, कुक्कुटपक्षी आणि स्वतःचे मेघगर्जनेसह विजांच्या कडकडाटपासून संरक्षण करावे. पावसाचा अंदाज लक्षात घेता भात रोपवाटिका, नवीन लावलेली फळबाग व भाजीपाला पिकातून जास्तीचे पाणी काढून टाकावे.

पावसाचा अंदाज लक्षात घेता बाजरी, मका, भुईमूग, सोयाबीन, मूग, उडीद, तूर अशा खरीप पिकांची पेरणी सुरू करावी. पेरणी करताना बुरशीजन्य रोगांपासून संरक्षण करण्यासाठी बियाणे पेरणीपूर्वी बियाण्यास बीजप्रक्रिया करावी. पेरणी केलेल्या क्षेत्रात नांगे भरावीत. ज्या ठिकाणी लवकर पेरणी झाली असेल त्या ठिकाणी शेत तणमुक्त ठेवावे.

 शेतकऱ्यांनी अशी घ्यावी काळजी

पावसाचा अंदाज लक्षात घेता वापश्यावर बीजप्रक्रिया करून मूग व उडीद पिकांची पेरणी सुरू ठेवावी. बनावट बियाणे, खतांपासून शेतकऱ्यांनी सावध असावे, पक्के बिल घेऊनच तसेच अधिकृत केंद्रातूनच शेतकऱ्यांनी खते, बियाणे खरेदी करावे, नकली वाणांपासून सावध होऊन फसवणूक टाळावी. स्वदेशीच्या नकली वाणांपासून शेतकऱ्यांनी सावधानता बाळगावी.

अनधिकृत, अवैधरीत्या व बिना बिलाने बियाणे व खतांची खरेदी करू नये. तसेच अशा कृषी निविष्ठांची अनधिकृतपणे विक्री करत असल्याचे दिसून आल्यास संबंधित तालुका कृषी अधिकारी किंवा जिल्हा अधिक्षक कृषी अधिकारी कार्यालय यांच्याकडे तक्रार करावी, असा सल्ला महात्मा फुले कृषी विद्यापीठाच्या विभागीय कृषी संशोधन केंद्र (इगतपुरी) येथील कृषी हवामान प्रक्षेत्र विभाग यांच्या ग्रामीण कृषी हवामान केंद्र यांच्याकडून देण्यात आली आहे.