Satara News : बिजवडी (ता. माण) परिसरासह जाधववाडी, तोंडले येथे गुरुवारी (ता. १७) दुपारच्या सुमारास वादळी वाऱ्यासह गारांचा पाऊस झाला. मोठमोठ्या गारा पडल्याने जाधववाडी, बिजवडीतील डाळिंब बागांचे मोठे नुकसान झाले.

कोरेगाव परिसरात एक तास मुसळधार व गारांसह पाऊस झाला. त्यानंतर रात्री साडेआठ वाजताही पुन्हा पावसाने हजेरी लावली. खटाव तालुक्यातील मायणी परिसरात पावसाने दमदार हजेरी शेतकऱ्यांना दिलासा मिळाला आहे.

माण तालुक्यातील बिजवडी, जाधववाडी, तोंडले परिसराला दुपारी वादळी वाऱ्यासह गारांचा जोरदार पाऊस झाला. क्रॉप कव्हर टाकलेल्या बागेत गारांचा खच पडला होता. यात अनेक शेतकऱ्यांची झाडेही उन्मळून पडली, तर विजेचे खांब व तारा तुटून पडल्याने वीजपुरवठाही खंडित झाला आहे.

या भागातील बहुतांश सर्व गावांना पिण्याच्या पाण्यासाठी शासनाचे टँकर सुरू आहेत. तरीही या भागातील शेतकऱ्यांनी धाडसाने विकतचे पाणी घालून बागांचे नियोजन केले आहे. काही बागांचे सेटिंग पूर्ण झाले आहे, तर काही बागांना फुलकळ्या निघत आहेत. वादळी वारा व गारांच्या पावसामुळे डाळिंबाचे मोठे नुकसान झाले आहे. खटाव तालुक्यातील मायणी विजांचा कडकडाट आणि वादळी वाऱ्यासह येथे सुमारे पाऊण तास दमदार पावसाने हजेरी लावली. या

पावसामुळे पेरणीपूर्व मशागतीला वेग येणार आहे. कोरेगाव शहर आणि परिसरात गुरुवारी दुपारी सव्वातीन ते सव्वाचार असा एक तास मुसळधार व गारांसह पाऊस झाला. त्यानंतर रात्री साडेआठ वाजताही पुन्हा पावसाने हजेरी लावली. उन्हाळी नांगरट करून ठेवलेल्या शेतात पाऊस झाल्याने सऱ्या भरून वाहत होत्‍या. दरम्यान, रात्री पुन्हा पावसाने हजेरी लावली. हा पाऊस रात्री नऊपर्यंत हलक्या ते मध्यम स्वरूपात सुरूच होता.