Jalgaon News : खानदेशात भुईमुगाची पेरणी किंवा लागवड पूर्ण होत आली आहे. यंदा क्षेत्रात किंचीत घट होईल, असे चित्र आहे. पेरणी या आठवड्यातही होईल, असेही संकेत आहेत. आगाप भुईमुगाची पेरणी नोव्हेंबरच्या अखेरिस अनेकांनी केली.

डिसेंबरमध्ये दुसऱ्या आठवड्यात भुईमूग पेरणीला वेग आला. अनेकांची पेरणी नोव्हेंबरअखेरिस झालेल्या पावसाने रखडली होती. सर्वाधिक पेरणी डिसेंबरच्या दुसऱ्या आठवड्यात झाली आहे. खानदेशात भुईमुगाची पेरणी जानेवारीच्या पहिल्या आठवड्यापर्यंत केली जाते. पुढील पाच ते सहा दिवस पेरणी होईल. त्यासाठी शेतकरी कमी कालावधीत येणाऱ्या वाणांना पसंती देतील, असेही संकेत आहेत.

मागील हंगामात खानदेशात सुमारे ८०० हेक्टरवर भुईमुगाची पेरणी झाली होती. यंदा ही पेरणी सुमारे ६७५ ते ६८० हेक्टरवर होईल, असे संकेत आहेत. यंदा पाऊसमान कमी होते. जळगाव जिल्ह्यातील पश्चिम भागात गिरणा धरणातून रब्बीसाठी आवर्तन न मिळाल्याने रब्बी हंगाम जेमतेम आहे.

जळगाव जिल्ह्यात सुमारे आठ टक्के पावसाची तूट होती. धुळ्यात २० टक्के व नंदुरबारातही सुमारे २० टक्के कमी पाऊस झाला आहे. काही सिंचन प्रकल्प १०० टक्के भरले. परंतु प्रमुख सिंचन प्रकल्प १०० टक्के भरलेच नाहीत. त्यात जळगावातील गिरणा, मन्याड, बहुळा, भोकरबारी, अग्नावती, धुळ्यातील अमरावती, मालनगाव, बुराई आदी प्रकल्पांचा समावेश आहे.

गिरणा पट्ट्यात पुढील महिन्यात टंचाई तयार होईल. यामुळे अनेकांनी हरभरा पेऱणीदेखील केलेली नाही. भुईमूग अधिक पाण्याचे पीक मानले जाते. भुईमुगाची पेरणी जळगाव जिल्ह्यातील चाळीसगाव, जामनेर, भडगाव, एरंडोल, धुळ्यातील साक्री, धुळे, नंदुरबारातील शहादा, नवापूर, नंदुरबार भागात घटली आहे.

२०२० ते २०२२ या तीन वर्षांत खानदेशात भुईमुगाची पेरणी ३०० हेक्टरवरून सुमारे ८५० हेक्टरवर पोचली होती. कारण या कालावधीत चांगला पाऊस झाला होता. कोविड काळातही भुईमुगास प्रतिक्विंटल ५००० रुपये दर (वाळविलेल्या शेंगा) मिळाला होता.

सातपुड्यालगत क्षेत्र स्थिर

खानदेशात जळगावातील गिरणा पट्टा, धुळ्यातील धुळे, साक्री आदी भागात भुईमुगाची पेरणी कमी झाली आहे. परंतु सातपुड्यालगत जळगावातील यावल, चोपडा, धुळ्यातील शिरपूर, नंदुरबारातील तळोदा भागात पेरणी स्थिर आहे.

जळगाव जिल्ह्यातील चोपडा तालुक्यात सर्वाधिक पेरणी झाल्याची माहिती आहे. तसेच नंदुरबारातील शहादा तालुक्यातील उत्तर भागातील काही गावांतही पेरणी स्थिर आहे. चोपडा भागात अनेक शेतकऱ्यांनी ठिबकच्या मदतीने सिंचन सुरू केले आहे.