Buldana News : बुलडाणा ः जिल्ह्यातील सिंदखेडराजा येथील ईश्वेद बायोटेकच्या लॅबमध्ये तयार झालेली ऊतिसंवर्धित प्रिमियम ग्रँड ग्रँड नाइन (GGN) केळीच्या रोपांची निर्यात आफ्रिकन बाजारपेठांमध्येसुरू झाली आहे.

या उपक्रमाअंतर्गत दोन दिवसांपूर्वी सुमारे ५० हजार रोपे पहिल्या टप्प्यात रवाना करण्यात आल्याची माहिती ईश्वेद समूहाचे अध्यक्ष तथा व्यवस्थापकीय संचालक संजय वायाळ यांनी ‘अॅग्रोवन’ला दिली. जागतिक कृषी क्षेत्रात सकारात्मक बदल घडवण्याच्या दिशेने महत्त्वपूर्ण पाऊल उचलत ईश्वेद बायोटेकच्या उच्च गुणवत्ता आणि उत्पादकता वाढवण्याच्या वचनबद्धतेचा हा एक ठोस पुरावा आहे.

जागतिक अन्नसुरक्षेला पाठबळ देत शेतकऱ्यांना सक्षम करण्याचे उद्दिष्ट ठेवून, ही निर्यात शाश्वत शेतीकडे एक महत्त्वपूर्ण वाटचाल ठरेल, असे वायाळ यांनी या वेळी सांगितले. ग्रँड ग्रँड नाईन हे केळीचे वाण लवचिकता आणि उच्च उत्पादनक्षमतेसाठी ओळखले जाते. विविध हवामान आणि भौगोलिक परिस्थितींशी समायोजित होण्याची क्षमता अफ्रिकन शेतीसाठीही फायदेशीर ठरेल. या उच्च-कार्यक्षमतेच्या वनस्पती प्रकाराची आफ्रिकेत ओळख करून देण्याचे ईश्वेद बायोटेकचे प्रयत्न आहेत.

तेथील कृषी उत्पादन क्षमता वाढवणे आणि शाश्वत शेती पद्धतीला प्रोत्साहन देणे आहे. शाश्वत शेती आणि सुधारित जीवनमानाच्या दिशेने जागतिक चळवळीत सहभागी होताना आम्हाला अभिमान वाटतो.

आमचे GGN केळीचे रोप केवळ शेतीतील नावीन्यपूर्णता दर्शवते असे नाही, तर जगभरातील शेतकऱ्यांसमवेतची आमची मजबूत भागीदारी आणि शाश्वत विकासाच्या दिशेने आमचे प्रयत्नही अधोरेखित करते. - संजय वायाळ, अध्यक्ष तथा व्यवस्थापकीय संचालक, ईश्वेद समूह