Washim News : केंद्र आणि राज्य शासनाच्या कृषीविषयक योजनांचा लाभ जलद आणि प्रभावीपणे शेतकऱ्यांपर्यंत पोहोचवण्यासाठी ‘ॲग्रिस्टॅक’ हा प्रकल्प कार्यान्वित करण्यात आला आहे. या उपक्रमाअंतर्गत शेतकऱ्यांची जमीन माहिती, आधार संलग्न माहिती आणि भू-संदर्भीय माहिती शेतकरी ओळख क्रमांकासोबत जोडली जाणार आहे.

हा क्रमांक नसल्यास शासकीय योजनांचा लाभ मिळणे कठीण होणार आहे. या प्रक्रियेमुळे शेतकऱ्यांना पीककर्ज, पंतप्रधान शेतकरी सन्मान निधी, पीकविमा योजना, बाजारपेठ माहिती, तसेच किमान आधारभूत किमतीवर खरेदीसाठी नोंदणी सहज आणि सोपी होईल.

तसेच, शेतजमिनीची संपूर्ण माहिती डिजिटल स्वरूपात उपलब्ध राहिल्यामुळे शासकीय योजनांचा लाभ तातडीने मिळू शकेल.

वाशीम जिल्ह्यातील सर्व शेतकऱ्यांनी सामाईक सेवा केंद्रामध्ये जाऊन शेतकरी ओळख क्रमांक तयार करण्याचे आवाहन करण्यात आले आहे. त्यासाठी आधार कार्ड, आधार संलग्न मोबाईल क्रमांक आणि ७/१२, ८-अ उतारा घेऊन जावे.