Kolhapur News : गोकुळ दूध संघ म्हैस दुधासाठी राज्यभर ओळखला जातो. म्हैस दुधाची बाजारपेठ अधिक व्यापक असून दुधाची मागणी जास्त आहे. त्यामुळे म्हैस दुधाचे संकलन वाढवणे अत्यंत आवश्यक आहे.

यासाठी गोकुळच्या जातीवंत म्हैस खरेदी अनुदान योजना तसेच दूध उत्पादकांसाठी असलेल्या विविध योजना भविष्यात अधिक प्रभावीपणे राबविणार असून जिल्ह्यातील व सीमा भागातील जास्तीत जास्त दूध गोकुळकडे संकलित होण्यासाठी सामूहिक प्रयत्‍न गरजेचे आहेत.

ज्‍यामुळे भविष्‍यात वीस लाख लिटर दूध संकलनाचे उदिष्ट साध्‍य होईल, असे मत कोल्हापूर जिल्हा सहकारी दूध उत्पादक संघाचे (गोकुळ) अध्यक्ष नविद मुश्रीफ यांनी येथे व्यक्त केले. वरिष्‍ठ अधिकारी, दूध संकलन विभागाचे अधिकारी व सुपरवायझर यांची तालुकानिहाय आढावा बैठक श्री. मुश्रीफ यांच्या अध्यक्षतेखाली झाली. दुग्ध व्यवसायातील आधुनिक संकल्पना, म्हैस दुधाच्या संकलन वाढीच्या संधी व त्यासाठी कराव्या लागणाऱ्या उपाययोजना यावर सविस्तर चर्चा करण्यात आली. या वेळी माजी अध्यक्ष विश्वास पाटील, माजी अध्यक्ष अरुण डोंगळे आदी उपस्थित होते.

दूध संकलनातील घट वाढ, कार्यक्षेत्रातील व बाहेरील दूध संकलन वाढीसाठी विविध उपायोजना, दुधाची गुणवत्ता, पशुसंवर्धन विभाग, पशुखाद्य विभाग, दूध उत्पादक शेतकऱ्यांचे प्रबोधन, संघाच्या विविध योजनांची अंमलबजावणीची गती वाढवणे या विविध मुद्द्यांवर सविस्तर चर्चा करण्यात आली. प्रास्ताविक डॉ. एम. पी. पाटील यांनी केले. आभार संचालक किसन चौगले यांनी मानले.

संचालक बाबासाहेब चौगले, शशिकांत पाटील–चुयेकर, किसन चौगले, नंदकुमार ढेंगे, कर्णसिंह गायकवाड, संभाजी पाटील, प्रकाश पाटील, बयाजी शेळके, बाळासाहेब खाडे, युवराज पाटील, संचालिका अंजना रेडेकर, संघाचे अधिकारी अनिल चौधरी, अरविंद जोशी, शरद तुरंबेकर, डॉ. प्रकाश साळुंके, व्ही. डी. पाटील, दत्तात्रय वाघरे उपस्थित होते.