Parbhani News : राज्यातील सहकारी दूध संघ व खासगी दूध प्रकल्प यांना दूधपुरवठा करणाऱ्या दूध उत्पादक शेतकऱ्यांना गायीच्या दुधासाठी प्रतिलिटर ५ रुपये प्रोत्साहनपर अनुदान देण्यात येणार आहे. या अंतर्गत परभणी व हिंगोली जिल्ह्यातील ४ खासगी दूध संस्था (प्रकल्प) या योजनेत सहभागी झाल्याची माहिती दुग्धव्यवसाय विकास विभागाच्या सूत्रांनी दिली.

परभणी येथील शासकीय दुग्धशाळेत परभणी व हिंगोली जिल्ह्यातील दूध उत्पादक पुरवठा सहकारी संस्थांकडून दूध संकलन केले जात होते. परंतु दर्जेदार दुधाला देण्यात येणारे कमी दर, दूध उत्पादक, सहकारी दूध उत्पादक संस्था, वाहतूकदारांची देयके वेळेवर अदा न करणे आदी कारणांनी दूध संकलनात घट सुरू झाली.

त्यात पशुखाद्याचे दर वाढत आहेत. दर परवडत नसल्यामुळे दूध उत्पादकांच्या अडचणी वाढल्या. अनेक जण खाजगी डेअरीकडे वळले. त्यामुळे ऑगस्ट २०२२ मध्ये शासकीय दूध खरेदी बंद झाली आहे. आता या दोन जिल्ह्यांतील दूध उत्पादक शेतकऱ्यांना खासगी दूध संकलन संस्थांकडे दुधाची विक्री करावी लागत आहे.

परभणी जिल्ह्यात परभणी, मानवत, पाथरी, गंगाखेड, ताडकळस (ता. पूर्णा) येथे खासगी संस्थांमार्फत दूध खरेदी केली जाते. सध्या प्रतिदिन २२ ते २३ हजार लिटर दूध संकलन होत आहे. हिंगोली जिल्ह्यात हिंगोली, वारंगा (ता. कमळनुरी), वसमत, मार्डी (ता. औंढा नागनाथ) येथे खासगी संस्थांकडून दूध खरेदी केली जाते. प्रतिदिन ३० ते ३५ हजार लिटर दूध संकलन आहे.

गायीच्या दुधासाठी प्रतिलिटर ५ रुपये प्रोत्साहनपर अनुदान देण्याबाबत कृषी, पशुसंवर्धन, दुग्धव्यवसाय विकास व मस्त्य व्यवसाय विकास विभागातर्फे जुलैमध्ये शासन निर्णय काढला आहे. याअंतर्गत अनुदानासाठी परभणी जिल्ह्यातील ३ व हिंगोली जिल्ह्यातील १ खासगी दूध संकलन संस्था सहभागी झाली आहे. या योजनेत सहभागी होणाऱ्या शेतकऱ्यांकडील दुधाळ जनावरांची नोंदणी (ईअर टॅग) भारत पशुधन पोर्टलवर असणे बंधनकारक आहे. शेतकऱ्यांचे आधार लिंक बँक खात्याची व दुधाळ पशुधनाची भारत पशुधन पोर्टलवर नोंदणी करण्याचे निर्देश आहेत