Pune News : जुन्नर तालुक्यात चारशे टन युरिया खताचा साठा (ता. २६) अखेर उपलब्ध असून, युरियाची कृत्रिम टंचाई व शेतकऱ्यांची अडवणूक करणाऱ्या विक्रेत्यावर कारवाई करण्यात येईल, असा इशारा पंचायत समितीचे कृषी अधिकारी तथा गुणनियंत्रण निरीक्षक नीलेश बुधवंत यांनी दिला आहे.

तालुक्यात १३ जून अखेर १,८५९ टन युरियाचा पुरवठा झाला होता. तालुक्यातील खरिपाचे क्षेत्र व झालेल्या पर्जन्यमानाचा विचार करता शेतकऱ्यांकडून युरियाची मागणी वाढली होती. यामुळे कृषी विकास अधिकारी जिल्हा परिषद पुणे यांच्या कार्यालयाकडे युरिया खताची मागणी कळविण्यात आली होती.

त्यानुसार बुधवार (ता.२६) अखेर तालुक्यात इफ्को कंपनीचा ३२० व पी.पी.एल. कंपनीचा ८६ टन युरिया खताचा पुरवठा झाला आहे. आरसीएफ कंपनीकडून १०० टन युरिया खताचे नियोजन केलेले आहे.

खत विक्रेत्यांनी कृत्रिम टंचाई करू नये. युरिया उपलब्ध असताना शेतकऱ्यांना नाही असे सांगू नये तसेच जादा दराने विक्री करू नये. युरिया सोबत इतर खतांची सक्ती करू नये.

विक्रेता युरियाची जादा दराने विक्री किंवा इतर खतांची सक्ती करत असल्यास शेतकरी बांधवांनी पंचायत समिती कृषी विभाग तसेच कृषी विभाग महाराष्ट्र शासन यांच्याशी संपर्क साधण्याचे आवाहन बुधवंत यांनी केले आहे.