Akola News : कमी पावसामुळे या वर्षी प्रकल्पातील पाणीसाठ्यात मोठी घट आली होती. सिंचनासाठी बहुतांश प्रकल्पातून पाणी न मिळाल्याने पीक लागवडीवरही परिणाम झाला. यामुळे जनावरांच्या चाऱ्याचाही प्रश्‍न गंभीर होण्याची शक्यता आहे. आगामी काळात अकोला, बुलडाणा, वाशीम जिल्ह्यात चाराचंटाईचे चटके जाणवू लागले आहेत.

या वर्षी मार्च महिन्यापासून चाऱ्याच्या टंचाईला सुरुवात झाली आहे. यंदा कमी व असमतोल पावसामुळे चारा उत्पादनात घट झालेली आहे. पशुपालकांना चाऱ्याचा प्रश्‍न भेडसावत आहे. उन्हाळ्यात हिरव्या चाऱ्याचा प्रश्‍न बिकट झालेला आहे. यातून मार्ग काढण्यासाठी बऱ्याच शेतकऱ्यांनी उन्हाळी ज्वारीची लागवड केलेली आहे.

मात्र याच महिन्यात अवकाळी व वादळाने ज्वारीच्या पिकाचे प्रचंड नुकसान केल्याने चाऱ्याचाही दर्जा खालावला आहे. अकोला जिल्ह्यात पाच लाख, बुलडाणा जिल्ह्यात साडेसात लाखांवर पशुधन आहे. या जनावरांसाठी दिवसागणिक चाऱ्याची आवश्‍यकता भासत आहे. सध्या चाराटंचाई नाही, असे प्रशासन सांगत असून चारा बियाणे वाटपाचाही दावा पशुसंवर्धन विभागातर्फे करण्यात येत आहे.

परप्रांतीय कळप दाखल

खरीप, रब्बी हंगामातील पिकांचे उत्पादन मिळाल्यानंतर अवशेषाच्या रूपात जनावरांना शेतशिवारात चारा उपलब्ध होतो. या चाऱ्यासाठी परप्रांतातील जनावरांचे कळप या वर्षी गुजरातसह इतर भागांतून दाखल झाले आहेत. त्यामुळे स्थानिक जनावरांसाठी चाऱ्याचा प्रश्‍न तयार झाला आहे.

...असे आहेत दर

ढेप ६० किलो बॅग १८५० रुपये

सुग्रास ५० किलो १३२०

मका भरडा ५० किलो १३००

गायीचे दूध दर ३.५ फॅटसाठी २९ रुपये

म्हैस ६.० फॅट ४५ रूपये