Kolhapur Milk Business : कोल्हापूर जिल्ह्यात शेतीबरोबर दूध व्यवसाय मोठ्या प्रमाणात केला जातो. परंतु मागच्या १५ दिवसात महापुरामुळे शेती पिकाचे मोठे नुकसान झाले. नदी काठावर असलेले गवती कुरण पूर्णपणे नष्ट झाले आहे तर उसात पाणी गेल्याने चिखल साचून राहिला आहे. ओला चारा नसल्याने जनावरांना सकस आहार मिळत नसल्याने मोठी समस्या निर्माण झाली आहे.

नदीकाठच्या शिवारात साधारण २० दिवस साचून राहिलेल्या महापुराच्या पाण्यामुळे ऊस पिकाबरोबर अन्य पिके कुजून गेली आहेत. पिकांचा अक्षरशः चिखल झाला असल्याचे पूर ओसरल्यानंतर पाहावयास मिळत आहे. त्यामुळे जनावरांना ओल्या चाऱ्याअभावी दूध व्यवसायवरही परिणाम झाला आहे. याबाबत प्रशासनाने तातडीने पंचनामा करून भरपाई द्यावी, अशी मागणी शेतकऱ्यांमधून होत आहे.

जिल्ह्यातील नद्यांना महापुराचे पाणी २० जुलैपासून शिवारात साचून राहिले होते. सध्या महापूर ओसरला तरी अजूनही काही ठिकाणी नदी पात्राबाहेर सखल भागात पाणी आहे. पिके तब्बल पंधरा दिवसांपेक्षा अधिक काळ पाण्याखाली गेली होती. परिणामी, ही पिके सध्या कुजण्याची प्रक्रिया सुरू झालेली आहे. त्यामुळे येथील पिके १०० टक्के कुजण्याची शक्यता असून, शासनाने पीक नुकसान भरपाई द्यावी, अशी मागणी शेतकऱ्यांतून होत आहे.

दरम्यान, अतिवृष्टीने पिकामध्ये पाणी साचून ओला चारा पूर्ण कुजला आहे. त्याचा परिणाम येथील दूध व्यवसायावर देखील झाला आहे. पुराच्या साठलेल्या पाण्यामुळे एकीकडे शेतीचे नुकसान आणि दुसरीकडे दूध व्यवसायाचे कंबरडे मोडले आहे.