Pune News : उरळगाव शिवारातील पाच एकर तोडणीसाठी तयार ऊस गुरुवारी (ता.२३) रात्री साडेअकरा वाजण्याच्या दरम्यान अज्ञात व्यक्तीने आग लावल्याने जळून खाक झाला.

शेतकरी पांडुरंग सात्रस यांचा कोळपे वस्ती हद्दीतील गट नंबर ४४९ मधील सुमारे अडीच एकर व भीमाजी कोळपे यांचा गट नंबर ७५२ मधील अडीच एकर असा एकूण ५ एकर ऊस जळाल्याने लाखो रुपयांचे नुकसान झाले.

दरम्यान, पांडुरंग सात्रस यांचा शेतकरी व इतर गावकरी धावल्याने त्यांचा या गटातील अडीच एकर ऊस व इतर शेतकऱ्यांचा आठ एकर असा एकूण दहा एकर ऊस आगीपासून वाचविण्यात यश आले.

सात्रस म्हणाले, ‘‘जळालेल्या उसाचे अंदाजे चार लाख रुपयांचे व उसा व्यतिरिक्त ठिबक सिंचन, पाइप, इतर साहित्य असे एकूण अंदाजे दीड लाख रुपयांचे नुकसान झाले आहे. जळालेल्या उसाचा पंचनामा मंडल अधिकारी मनीषा खैरे व गावकामगार तलाठी टिळेकर यांनी केला.