Virar News : मासेमारीचा नवीन हंगाम नुकताच सुरू झाला होता. यंदा जाळ्यात चांगली मासळीही मिळत होती. रावस, सुरमई, पापलेट, बोंबील मिळत असतानाच पुन्हा एकदा निसर्गाने मच्छीमारांवर अवकृपा दाखवून त्यांच्या तोंडचा घास हिरावून नेला आहे. गेल्या आठ दिवसांपासून समुद्रात घोंगावणाऱ्या वाऱ्यामुळे मच्छीमारांचे नुकसान झाले आहे.

१५ ऑगस्टपासून मच्छीमारी पुन्हा सुरू झाल्याने कोळी लोकांमध्ये आनंद होता. जवळपास दोन महिने घरी बसून काढल्यावर आता कुठे दोन पैसे हाती लागतील, असे वाटतच असताना समुद्रात वादळी वारे वाहू लागल्याने बोटींचे मोठ्या प्रमाणात नुकसान झाले. त्यातच मासळी पकडण्याची जाळीही फाटली.

मागील हंगामाच्या शेवटी आणि हिवाळ्यात मच्छीमारी बोटी समुद्रात गेल्यानंतरही मासळी मिळाली नव्हती. चार दिवसांपासून बोटी किनाऱ्यावर असून उद्या (ता. ३०)पर्यंत थांबणार आहेत. पुढे वादळ कायम राहिले, तर आणखीन काही दिवस बोटी किनाऱ्यावरच राहण्याची शक्यता आहे.

मासळीचे ठिकाण बदलण्याचा अंदाज

वादळी वाऱ्यानंतर समुद्रात झालेल्या हालचालींमुळे मासळी घाबरून प्रवाहासोबत अन्य ठिकाणी फेकली जाते. त्यामुळे समुद्रात मासळी दुष्काळ पडतो. या वादळानंतरदेखील मासळी दुष्काळ पडण्याची भीती मच्छीमारांमध्ये असल्याचे नायगावचे माजी सरपंच निवृत्ती घुसेकर यांनी सांगितले.

दर्जानुसार पापलेटच्या किमती

गेल्या वर्षीचा भाव आताचा भाव

सुपर १४०० १६००

नंबर १ ११५० १२५०

नंबर २ ९५० ९९०

नंबर ३ ७५० ७७५

नंबर ४ ४०० ५०५

काफरी नंबर १ १२०० १२५०

नंबर २ १००० ९५०

नंबर ३ ६०० ६५०