Jalna News : मच्छिंद्रनाथ चिंचोली (ता. घनसावंगी) येथील लघुसिंचन तलावातील मासे अचानक मृत्यू पावत असल्याने या तलावात मत्स्य व्यवसाय करणाऱ्या भोई समाजाचे सुमारे २५ लाख रुपयांचे नुकसान झाल्याचा अंदाज आहे. हा प्रकार कशामुळे झाला याचा ताळमेळ लागत नसल्याने हतबल भोई समाज बांधवानी नुकसान भरपाई देण्याची मागणी केली आहे.

मच्छिंद्रनाथ चिंचोली (ता. घनसावंगी) येथील लघुसिंचन तलावात गेल्या अनेक वर्षांपासून तेरणा मत्स्य व्यावसायिक सहकारी संस्था मर्यादित या संस्थेच्या नावाने येथील कैलास खुशालराव होले यांच्यासह इतर जण मत्स्य बीज सोडून व्यवसाय करतात, मात्र गेल्या चार ते पाच दिवसांपासून या तलावातील मासे अचानक मृत्यू पावत आहे.

यातून जवळपास तीस टन मासे मृत झाले आहे. यामुळे २५ लाखांवर नुकसान झाले आहे. भोई समाज बांधवांनी जिल्हा मत्स्य व्यवसाय अधिकारी कार्यालयात तक्रार दिल्यानंतर सहायक जिल्हा मत्स्य व्यावसायिक अधिकारी डॉ. रश्मी सतीश आबुंलकर, कनिष्ठ सहायक श्री हरणे यांनी गुरुवारी (ता. ८) या तलावाला भेट देऊन मृत्यू पावलेल्या माशांची पाहणी केली.

दरम्यान डॉ. रश्मी आंबुलकर यांनी या तलावाचा पंचनामा करून तलावात पाण्याची पातळी खालावली आहे तसेच तलावामध्ये गाळ साचल्याचे देखील दिसून आले. त्याचबरोबर या तलावाच पाणी घेऊन प्रयोगशाळेत तपासणीसाठी पाठविले.

पाणी पातळी कमी होणे व गाळ साचल्यामुळे माशांना ऑक्सिजन कमी मिळाल्याने या माशांचा मृत्यू झाला असावा असा अंदाज व्यक्त केला. यावेळी तेरणा मत्स्य व्यावसायिक संस्थेचे अध्यक्ष कैलास होले, लता होले, सोमनाथ होले, राजेंद्र बिडवे, कस्तुराबाई भवरे, अनिता होले यांच्यासह इतरांची उपस्थिती होती.