Solapur News : वार्षिक आशियायी वॉटरबर्ड सेन्सस (एडब्ल्यूसी) अंतर्गत वाइल्डलाइफ रिसर्च अँड कॉन्झर्व्हेशन सोसायटी (डब्ल्यूआरसीएस) आणि सोलापूर वनविभाग यांच्या संयुक्त विद्यमाने उजनी जलाशयात पहिला जलपक्षी गणना कार्यक्रम जाहीर करण्यात आला आहे. त्यासाठी ३ मार्चला पक्षिगणना कार्यक्रम आयोजित केला असल्याची माहिती उपवनसंरक्षक धैर्यशील पाटील यांनी दिली.

उजनी जलाशय हे वैविध्यपूर्ण पक्षीजीवनासाठी प्रसि‌द्ध आहे. बदके, करकोचे, पाणकोंबड्या, वेडर्स यासह ३०० हून अधिक प्रजाती इथे आढळतात. हा महत्त्वपूर्ण जलाशय, स्थानिक आणि स्थलांतरित पक्ष्यांना निवारा व मुक्कामासाठी उपयुक्त आहे.

उजनी जलपक्षी गणना हा एक नागरिक विज्ञान (Citizen-Science) कार्यक्रम आहे. या जलपक्षी गणनेद्वारे जलपक्ष्यांची संख्या व त्यांचा विस्तार याबद्दल उपयुक्त माहिती मिळेल. त्याद्वारे जलपक्ष्यांच्या संर्वधनाला व त्यांच्या पाणथळ अधिवासाच्या संरक्षणाला व व्यवस्थापनाला मदत होईल.

आज नोंदणीचा अंतिम दिवस

जलपक्षी गणनेसाठी नोंदणीची अंतिम तारीख २८ फेब्रुवारी आहे. इच्छुक पक्षी निरीक्षक व निसर्गप्रेमींनी डब्ल्यूआरसीएस संस्थेच्या संकेतस्थळावर उपलब्ध असलेला ऑनलाइन फॉर्म भरून जलपक्षी गणनेसाठी नोंदणी करावी.

अधिक माहितीसाठी भ्रमणध्वनी क्रमांक- ९०२८८५१८१० व दूरध्वनीवर क्र. ०२०-४६७०४९०७ यावर संपर्क करावा, असे आवाहनही उपवनसंरक्षक पाटील यांनी केले.