Uran News : अतिवृष्टीमुळे उरण तालुक्यातील भातशेतीचे मोठे नुकसान झाले आहे. भाताची रोपे पाण्याखाली आल्याने अक्षरशः कुजूली आहेत. आता तिबार पेरणीलाही अवधी नसल्याने भातशेती ओसाड पडण्याची भीती आहे. त्यामुळे येथील बळीराजा संकटात सापडला असून येत्या काळात उपासमारीची वेळ येण्याची चिंता शेतकऱ्यांना आहे.

सलग सहा दिवस उरण तालुक्याला पावसाने झोडपले आहे. भाताचे कोठार म्हणून ओळखल्या जाणाऱ्या उरण तालुक्यातील पूर्व विभागातील शेतकरी हवालदिल झाले आहेत. अतिवृष्टीमुळे ग्रामीण भागातील अनेकांचे जनजीवन विस्कळित झाले आहे.

तालुक्यातील चिरनेर, कळंबुसरे, मोठी जुई, बोरखार, धाकटी जुई, टाकीगाव, विंधणे, दिघोडे, आवरे, गोवठणे, पाले, पिरकोन, खोपटे, चाणजे, नागाव, केगाव आदी भागातील काही शेतकऱ्यांच्या शेताचे बांध फुटून पाणी भातशेतीत घुसले आहे.

रोपांवर गाळ, कचरा

पुराच्या पाण्यासह चिखल-गाळ, काडीकचरा भातावर पडल्यामुळे संपूर्ण पीक कुजून गेले आहे. शेतात गाळ साचल्याने शेतीचे नुकसान झाले आहे. संकटात अडकलेल्या शेतकऱ्यांना दिलासा देण्यासाठी सरकारने भातपिकाचे तत्काळ पंचनामे करून आर्थिक मदत करावी, अशी मागणी शेतकऱ्यांकडून करण्यात येत आहे.