Buldana News : सध्या खरीप हंगामातील सोयाबीन, मका, तूर व इतर कडधान्यांबरोबरच भुईमुगाच्या पेरणीला सुरुवात झाली आहे. या पेरणी काळात मजुरांची सर्वत्र कमतरता भासत आहे. यावर पर्याय म्हणून सध्या शेतकरी टोकण यंत्राला पसंती देत असून त्याद्वारे पेरणी करीत आहेत. या लागवड पद्धतीने वेळ, पैसा तसेच श्रमातही बचत होत आहे.

पेरणीची लगबग म्हटली की शेतकऱ्याला कामे आटोपण्याची घाई असते. नेमके त्याच वेळेस मजुरांची कमतरता भासते. त्याबरोबरच मजुरीचे दरही गगनाला भिडतात. गेल्या काही वर्षांत शेतीत आधुनिकता आली असून यांत्रिक शेती करण्याकडे शेतकऱ्यांचा कल वाढला आहे.

सध्या या तालुक्यासह परिसरात पावसाने दमदार एन्ट्री केल्याने पेरणीला वेग आला आहे. तालुक्यात कापूस, सोयाबीन, मका, तूर, उडीद, मूग आदी पिकांची पेरणी शेतकरी करीत असून मजुरांची एकच धांदल उडाली. शेतकऱ्यांनी मका, तूर, सोयाबीन, उडीद, मूग व भुईमुगाच्या पेरणीसाठी सर्रास टोकण यंत्र वापरण्याकडे भर दिला आहे.

पेरणीचे हे टोकण यंत्र वाजवी किमतीत उपलब्ध असून वापरण्यास अगदी सोपे आहे. वजनाने हलके असल्याने एक व्यक्ती एका ठिकाणाहून दुसऱ्या ठिकाणी सहज नेऊ शकतो व पेरणी करू शकतो.

एका दिवसात चार ते पाच एकरची पेरणी

या यंत्राच्या साहाय्याने बियाणे टोकण केले जाते. यात वेगवेगळ्या प्रकारचे टोकण रोलर असल्याने सर्व प्रकारचे बियाणे लावता येते. बियाण्याची खोली आणि एक व दोन बियाणे एकदाच टोकण करता येतात. या यंत्रात एकावेळी जवळपास दोन किलो बियाणे बसते. एक व्यक्ती एका दिवसात चार ते पाच एकर बियाणे शेतात सहज टोकण करू शकतो.