Jalna News : केंद्रीय कापूस संशोधन केंद्र, नागपूर व कृषी विज्ञान केंद्र, खरपुडी, जालना यांच्या संयुक्त विद्यमाने शनिवारी (ता. २७) कृषी विज्ञान केंद्र, खरपुडी जालना येथे एकात्मिक कापूस लागवड व्यवस्थापन या विषयावर एक दिवसीय प्रशिक्षण कार्यक्रम घेण्यात आला.

उद्घाटन कार्यक्रमासाठी व्यासपीठावर कृषी विज्ञान केंद्राचे वरिष्ठ शास्त्रज्ञ व प्रमुख, डॉ. एस. व्ही. सोनुने, कीटकशास्त्रज्ञ प्रा.अजय मिटकरी, मृद शास्त्रज्ञ राहुल चौधरी, कृषी अभियंता पंडित वासरे, नुजीविडू सीडचे विभागीय व्यवस्थापक एस.पी.पवार, प्रभात सीडचे जिल्हा व्यवस्थापक रवींद्र तायडे, नुजीविडू सीडचे जिल्हा व्यवस्थापक सचिन अंधारे यांची प्रमुख उपस्थिती होती.

यावेळी एस. पी. पवार यांनी कापसातील वाढरोधकाचा वापर या विषयी मार्गदर्शन केले. प्रा. अजय मिटकरी यांनी कापूस पिकातील एकात्मिक कीड व्यवस्थापन या विषयावर मार्गदर्शन केले. तर प्रा. राहुल चौधरी यांनी एकात्मिक अन्नद्रव्य व्यवस्थापन तसेच पंडित वासरे यांनी पाणी व्यवस्थापन या विषयावर मार्गदर्शन केले.

सर्व प्रशिक्षणार्थी शेतकऱ्यांनी कापूस पिकात प्रत्यक्ष फळ फांदी व वाढ फांदीची ओळख करून देण्यात आली व वाढ फांदी काढण्याचे प्रात्यक्षिक करून दाखविण्यात आले. प्रशिक्षणासाठी जिल्ह्यातील शेतकरी मोठ्या संख्येने उपस्थित होते.