Pune News : खरीप हंगामात कमी झालेल्या पावसामुळे रब्बी हंगामात चारा पीक असलेल्या मका पिकांकडे कल वाढला आहे. त्यामुळे मका पिकांच्या क्षेत्रात चांगलीच वाढ होऊ लागली आहे.

पुणे विभागात आतापर्यंत सरासरीच्या ६७ हजार ५५८ हेक्टरपैकी ३० हजार ९९० हेक्टरवर मका पीक घेतले आहे. त्यामुळे येत्या काळात जनावरांसाठी काही प्रमाणात चारा उपलब्ध होईल.

विविध तालुक्यांत डेअरी उद्योगांच्या माध्यमातून दुग्धपूरक उद्योग वाढीस लागले आहेत. मका पिकाच्या वैशिष्ट्यपूर्ण गुणधर्मामुळे दूध उत्पादनात वाढ होऊन दुधाची गुणवत्ता चांगली येते.

त्यासोबतच मक्याच्या चाऱ्याचा वापर करून मुरघास म्हणून केला जातो. उन्हाळ्यात सुद्धा ओल्या चाऱ्याची उपलब्धता मुरघासामुळे जनावरांना होते. त्यामुळे जनावरांच्या दुग्ध उत्पादनात कोणताही बदल होत नसल्याने शेतकऱ्यांना चांगलाच आर्थिक नफा मिळतो.

पुणे विभागासह राज्यात गायी, म्हशी, शेळ्या, कालवडी, बैल यांची जवळपास तीन ते साडेतीन कोटी जनावरांची संख्या आहे. यंदा कमी पावसामुळे चाराटंचाई भासू नये म्हणून शेतकरी पुढाकार घेत चारा पिकांचे नियोजन करत आहेत.

पुणे परिसरातील अनेक शेतकरी मक्याचे दाणे काढण्यासाठी मोठ्या आकाराच्या कणसाच्या मक्याची लागवड करतात. त्यामुळे मका लागवडीच्या क्षेत्रात दिवसेंदिवस वाढ होत आहे.

पुणे विभागात पीकनिहाय

झालेली पेरणी (हेक्टर)

जिल्हा सरासरी

क्षेत्र लागवड

झालेले क्षेत्र टक्के

नगर १४,११८ ४,११५ २९

पुणे १६,९४७ ६,५६० ३९

सोलापूर ३६,४९३ २०,३१५ ५६

एकूण ६७,५५८ ३०,९९० ४६