Nashik News : देवळा तालुक्यातील उमराणे येथील श्री रामेश्वर कृषी मार्केट या खासगी बाजार समितीमध्ये कांदा विक्री केलेल्या शेतकऱ्यांचे गेल्या चार ते पाच महिन्यांपासून मिळत नसल्याने शेतकऱ्यांचा संयम सुटला. शंभरहून अधिक शेतकरी मंगळवारी (ता.८) या बाजार समितीचे प्रवेशद्वारावर एकवटले होते. यावेळी ठिय्या देत जोरदार घोषणाबाजी करण्यात आली. ‘कष्टाचे पैसे द्या’ असे शेतकऱ्यांची मागणी होती.

यावर बुधवार(ता.९) रोजी बाजार समितीकडून थकीत रकमेचे खरीप कांदा विक्रीचे धनादेश वाटप प्रक्रिया हाती घेण्यात आल्याचे सांगण्यात आले. खारीफाटा येथे खासगी बाजार समिती अस्तित्वात आल्यानंतर गेल्या पाच वर्षांपासून बाजार समितीमध्ये कांदा विक्रीसाठी शेतकऱ्यांची गर्दी आहे.मात्र एका व्यापाऱ्याकडून कांदा खरेदी परिषद शेतकऱ्यांची देणे थकवल्याने शेतकऱ्यांचा संताप उफाळून आला.

बाजार समितीने दुर्लक्ष केल्याने आम्हाला फटका बसल्याचे शेतकऱ्यांचे म्हणणे होते. ही बाब बाजार समिती व्यवस्थापनाने गांभीर्याने घेतले आहे. बाजार समितीमधील व्यापाऱ्याने गेल्या काही महिन्यांपासून खरीप तसेच उन्हाळ कांद्याचे पैसे दिलेले नाहीत. "पैसे देतो" तोंडी शब्द देऊन आत्तापर्यंत वेळ मारून गेली. शेतकऱ्यांनी वेळोवेळी मागणी करूनही पैसे शेतकऱ्यांना वेळेवर भेटले नाहीत.

या प्रकारामुळे शेतकऱ्यांची आर्थिक कोंडी झाल्याने शेतकऱ्यांचा संताप उफाळून आला. बाजार समिती प्रशासनाने या प्रकरणात लक्ष घालून पैसे देण्याची मागणी आंदोलकांनी या वेळी केली.

बाजार समितीकडून धनादेश वाटप सुरू

डिसेंबर व जानेवारी महिन्यांत विक्री झालेल्या खरीप कांदा उत्पादक शेतकऱ्यांना धनादेश वाटप सुरू करण्यात आले आहे. काही अडचणी आहेत; मात्र त्यावर तोडगा काढण्यासाठी बाजार समिती काम करत आहे. शेतकऱ्यांना पैसे मिळतील. अर्धवट व चुकीच्या माहितीवर शेतकऱ्यांनी विश्वास ठेवू नये. शेतकऱ्यांच्या कष्टाला न्याय देण्यासाठी आम्ही कटिबद्ध आहोत, असे श्री रामेश्वर कृषी मार्केटचे प्रमुख संचालक श्रीपाल ओस्तवाल यांनी ‘ॲग्रोवन’शी बोलताना सांगितले.