Roha News : 1अष्टमी भालगाव मार्गे आगारदांडा रेल्वे मालगाडी मार्गासाठी जमीन संपादन प्रक्रिया सुरू करण्यात आली आहे. प्रकल्पग्रस्त शेतकऱ्यांच्या सातबाऱ्यावर ई-पेन्सिल नोंदी टाकण्यात आल्याने शेतकऱ्यांमध्ये संतापाची भावना आहे.

त्‍यामुळे जमीन संपादन प्रक्रियेविरोधात शेतकऱ्यांनी बैठक बोलावली होती. या बैठकीत विविध मागण्या मांडण्यात आल्या आहेत. सदरील मागण्या मान्य न केल्यास आंदोलन छेडणार असल्याचा इशारा प्रकल्पबाधित शेतकऱ्यांनी दिला आहे.

केंद्र सरकारने नुकतीच मंजुरी दिलेल्या दिघी पोर्टसाठी रोहा ते आगारदांडा मालवाहतूक रेल्वे मार्गाकरिता जमीन संपादन प्रक्रिया सुरू झाली आहे, मात्र शेतकऱ्यांना विश्वासात न घेता सदरील संपादन प्रक्रिया सुरू असल्याचा दावा, शेतकऱ्यांनी केला आहे.

त्‍यामुळे रेल्‍वे प्रशासनाच्‍या या मनमानी कारभाराविरोधात पुढची दिशा ठरविण्यासाठी रोहे तालुक्यातील कांडणे येथे शेकतरी व स्थानिक नागरिकांची विभागीय सभा पार पडली. या वेळी व्यासपीठावर अध्यक्ष श्रीनिवास साठे, शेतकरी नेते राजेंद्र जाधव, रेल्वे प्रकल्प अभ्यासक नथुराम माळी, अंकुश मिसाळ तसेच विभागातील आठ गावातील शेतकरी व प्रमुख नागरिक मोठ्या संख्येने उपस्थित होते.

अध्यक्ष श्रीनिवास साठे यांनी दि. बा. पाटील व प्रभाकर पाटील यांच्यासारखा शेतकऱ्यांचा खंभीर नेता राहिलेला नाही. त्यामुळे शासन आणि प्रशासनाविरोधात लढण्यासाठी संघटित होऊन संघर्ष करावा लागणार असल्याचे सांगितले. डॉ. बाबासाहेब आंबेडकर, दि. बा. पाटील यांनाच आदर्शवत मानून लढा देऊ, असे परखड मत श्रीनिवास साठे यांनी व्यक्त केले.