Ambad News : आज ना उद्या कापसाला चांगला भाव मिळेल, या अपेक्षेने अंबड तालुक्यातील अनेक शेतकऱ्यांनी कापूस व सोयाबीन स्वतःच्या घरात साठवून ठेवला आहे. पण, अद्यापही कापसाला पाहिजे तसा भाव मिळत नसल्याने शेतकरी चिंतातुर झाला आहे.

शेतकऱ्यांनी मोठ्या कष्टाने पिकविलेल्या कापसाला आजघडीला सात हजार रुपये प्रति क्विंटल व सोयाबीनला साडेचार हजार रुपये प्रतिक्विंटल पेक्षा अधिक भाव अजूनपर्यंत मिळालेला नाही.

त्यातच शासनही शेतकऱ्यांच्या मालाला हमी भाव देण्यास तयार नाही. त्यामुळे शेतकरी अजूनही भाव वाढीच्या प्रतीक्षेत आहे. घरात कापूस, सोयाबीन साठवून ठेवायचे तरी किती दिवस? असा प्रश्न शेतकऱ्याला सतावत आहे. त्यातच घरात साठवून ठेवलेल्या कापसाचे शॉर्ट सर्किट, आग यापासून संरक्षण करताना शेतकऱ्यांची दमछाक होते आहे.

घरात साठवून ठेवलेल्या शेतमालाची विक्री होत नसल्याने भाव वाढीसाठीच्या अपेक्षेची जागा आता चिंतेने घेतली आहे. अनेक शेतकऱ्यांनी गत वर्षीचा कापूस अजूनही विक्री केलेला नाही.

आज ना उद्या भाव वाढतील, अशी अशा शेतकरी मनाशी बाळगून आहे. शेतकऱ्यांच्या मालाला शासनाकडून योग्य भाव मिळण्याची कोणतीच चिन्हे सध्यातरी दिसून येत नसल्याने बळीराजाच्या काळजीत भर पडली आहे.