Ahilyanagar News : शेतकरी आणि मजूर आमची ताकद आहे. त्यामुळे शेतकरी आणि मजुरांसाठी आम्ही काहीही करण्यास तयार आहोत. शेतकरी, ऊस उत्पादकांवर अन्याय झाला, तर तो आम्ही खपवून घेणार नाही, असा इशारा प्रहार जनशक्ती पक्षाचे नेते बच्चू कडू यांनी येथे दिला.

नेवासा येथे प्रहार जनशक्ती पक्षाचे उमेदवार, माजी आमदार बाळासाहेब मुरकुटे यांच्या प्रचारासाठी आमदार श्री. कडू यांची सभा झाली. आमदार श्री. कडू म्हणाले, ‘‘नेवाशा विधानसभा मतदार संघात काहीही झालं तरी बाळासाहेब मुरकुटे हे जिंकणारच आहेत.

शंकरराव गडाखांना हरविल्याशिवाय ते राहणार नाहीत. या तालुक्यात उसाला टनाला पाचशे रुपये कमी दिले. त्याचा बदला शेतकरी घेतील.’’ ‘‘शनिशिंगणापूर सारख्या पवित्र ठिकाणी भ्रष्टाचार करणाऱ्यांना माफी नाही. दादागिरी खपवून घेणार नाही. मी सहा महिन्यांनी येथेच येईन.

येणारे सरकार हे महाशक्तीचे, प्रहारचे असेल. आघाडी आणि युतीत पूर्ण बिघाडी झालेली आहे. देवेगौडा सात खासदारांवर पंतप्रधान झाले होते. त्यामुळे सत्ता आमचीच असेल.

उसाला दर कसा भेटत नाही ते पाहू, दिव्यांगांना महिन्याला सहा हजार देण्याचा, ग्रामीण भागात घरकुलाची रक्कम पाच लाख व्हावी यासाठी आम्ही प्रयत्न करणार आहोत,’’ असे श्री. कडू म्हणाले.

श्री. मुरकुटे म्हणाले, ‘‘शेतकरी आणि मजुरांसाठी आम्ही वट्टेल ते करू. सरकार कुणाचेही असो, हुकूमत आमची असेल. या वेळी ऊसदराचे शेतकऱ्याचे पाचशे रुपये दिले नाहीत, तर आम्ही लढा उभारू.’’