Satara News : शेतकऱ्यांना आर्थिकदृष्‍ट्या सक्षम बनविणे व पर्यावरणाच्या समतोलासाठी शेताचे बांध, माळरान, पडीक जमिनीवर शेतकऱ्यांनी बांबूची लागवड करण्यासाठी ग्रामपंचायत विभाग (रोजगार हमी योजना), कृषी व सामाजिक वनीकरण विभाग गावोगावी जनजागृतीबरोबर शेतकऱ्यांशी संवाद साधत बांबू लागवडीचे महत्त्व सांगत आहेत.

या उपक्रमाच्या माध्यमातून जिल्ह्यात सुमारे चार हजार २३९ हेक्टर क्षेत्रावर बांबू लागवडीचे उद्दिष्ट देण्यात आले आहे. त्यापैकी जुलैअखेर जिल्ह्यातील दोन हजार १०५ शेतकऱ्यांनी एक हजार १४८ हेक्टर क्षेत्रावर बांबू लागवड सुरू केली आहे.

जिल्ह्यामध्ये बांबू लागवडीच्या माध्यमातून शेतकऱ्यांच्या उत्पन्नामध्ये वाढ करण्याच्या उद्देशाने बांबू लागवड कार्यक्रम सुरू करण्यात आला आहे. बांबू इतर सर्व झाडांपेक्षा जास्त प्रमाणात हवेतील कार्बन शोषते आणि ऑक्सिजन देते. त्यामुळे बांबू लागवड हा ग्लोबल वॉर्मिंगवर एक उत्तम उपाय ठरू शकतो. इतर पिकांच्या तुलनेत बांबूच्या शेतीवर ३० ते ४० टक्के कमी खर्च येत आहे.

बांबू लागवडीमुळे शेत जमिनीची धूप व जलसंवर्धन या दोन्ही बाबींचा सुद्धा फायदा होत आहे. बांबू लागवड केल्यानंतर तिसऱ्या वर्षांनंतर बांबू काढता येत असल्यामुळे शेतकऱ्यांना शाश्वत उत्पन्न मिळण्यास मदत होत आहे. त्यामुळे बांबूची शेती करण्यासाठी

शेतकऱ्यांना मनरेगांतर्गत प्रोत्साहन दिले जात आहे. त्याला शेतकऱ्यांचा चांगला प्रतिसाद मिळत असल्याने बांबू लागवड अभियान जिल्ह्यात गतीने सुरू आहे. बांबू लागवड करण्यासाठी शेतकऱ्यांमध्‍ये गावोगावी जनजागृती केली जात आहे.

पर्यावरण संवर्धन आणि आर्थिक नफ्याच्या दृष्टीने बांबू लागवड फायदेशीर असल्याने जिल्ह्यातील जास्तीत जास्त शेतकऱ्यांनी या योजनेचा लाभ घेणे आवश्‍यक असल्याचे मुख्य कार्यकारी अधिकारी याशनी नागराजन यांनी सांगितले.

तालुकानिहाय लागवडीवर दृष्‍टिक्षेप (लागवड हेक्टर)

जावळी : ६४.४७, कऱ्हाड : ११३.३७, खंडाळा : ६६.९८, खटाव : १६४.२७, कोरेगाव : १०७.५९, महाबळेश्वर : १०१.९, माण : १८८.१५, पाटण : ३६.३५, फलटण : १४७.७८, सातारा : १००.५१, वाई : ५७.०४.