Pune News : महाराष्ट्रासह पुणे जिल्ह्यात मेमध्ये मॉन्सूनपूर्व पावसाने चांगलाच धुमाकूळ घातला होता. त्यामुळे शेतीची कामे ठप्प झाली होती. पिकांचे मोठ्या प्रमाणात नुकसान होऊन शेतकरी आर्थिक संकटात सापडला. मात्र, मागील आठवड्यापासून काही प्रमाणात पावसाने उघडीप दिल्याने जिल्ह्याच्या पूर्व व उत्तर भागातील शेतकऱ्यांनी शेतीच्या कामांना सुरुवात केली आहे.

चालू वर्षीच्या कडक उन्हाळ्यानंतर पावसाळ्यापूर्वीच मॉन्सूनपूर्व पावसाचे जोरदार आगमन झाल्याने दौंड, बारामती, इंदापूर, पुरंदर, खेड, शिरूर, जुन्रर व आंबेगाव तालुक्यात शेतीचे मोठे नुकसान झाले. सर्व पिके पाण्याखाली गेल्याने शेतकरी चिंताग्रस्त झाले; परंतु आता पावसाने उघडीप दिल्याने शेतकरी सावरू लागला असून शेतीच्या कामांना वेग आला आहे.

उन्हाळ्यात नांगरणी करून शेती तापायला ठेवली जाते. त्यामुळे पिके जोरदार येऊन उत्पादनात वाढ होते; परंतु यावर्षी उन्हाळ्यातच पाऊस पडल्याने जमीन तापायला वेळ मिळाला नाही. आता जमिनीत वाफसा आल्याने फणनी, कोळपणी व जमीन पिकासाठी तयार करण्यात येत आहे.

कृषी विभागाकडून खरिपाची तयारी करण्यात आली आहे. जिल्ह्यात खते व बियाणांचा पुरवठा वेगाने करण्यात येत आहे. पावसामुळे खते व बियाणे वितरित करण्यामध्ये काही प्रमाणात अडथळे आले होते. परंतु आता कृषी विभागाने तातडीने पावले उचलत वेगाने हा पुरवठा करण्यासाठी सूचना दिल्या आहेत.

त्यानुसार हा पुरवठा कृषी सेवा केंद्र चालकांना होत आहे. त्यामुळे शेतकऱ्यांना वेळेत खते व बियाणे मिळणार आहेत.

सोरतापवाडी येथील नंदकुमार चौधरी म्हणाले, की पूर्व हवेलीत उन्हाळ्यात यावर्षी विहिरी व बोअरवेल भरल्या आहेत. पावसाने उघडीप दिल्याने शेतीच्या कामाची लगबग सुरू झाली आहे. आडसाली ऊस लावण्याची शेतकऱ्यांची लगबग सुरू झाली आहे. या वर्षी बाजरी, ऊस, मका, भुईमूग व फुलशेती वाढणार आहे.