Latur News : लातूर ः केंद्र शासनाच्या नवीन व नवीकरणीय ऊर्जा मंत्रालयामार्फत ‘पीएम कुसुम योजना’ राबविली जात आहे. त्याद्वारे शेतकऱ्यांना सौर कृषी पंप अनुदान तत्त्वावर देण्यात येत आहेत.

त्यासाठी शेतकऱ्यांना पाच ते दहा टक्के लाभार्थी हिस्सा ऑनलाइन भरावा लागतो. पण याचे खोटे संदेश पाठवून शेतकऱ्यांची फसवणूक केल्याचे प्रकार राज्यात घडत आहेत.

त्यामुळे शेतकऱ्यांनी अशा खोट्या संदेशांपासून सावध राहावे. असा संदेश आला तर ‘महाऊर्जा’कडे याची खात्री करूनच ऑनलाइन पैसे भरावेत, असे आवाहन ‘महाऊर्जा’चे लातूरचे विभागीय महाव्यवस्थापक समीर घोडके यांनी केले आहे.

‘पीएम कुसुम योजनेद्वारे तीन, पाच व साडेसात एचपी क्षमतेचे सौर कृषी पंप ९० ते ९५ टक्के अनुदानावर शेतकऱ्यांना दिले जात आहेत. राज्य शासनाने या योजनेसाठी एक लाख चार हजार ८२३ सौर कृषी पंपांसाठी मान्यता दिली आहे.

त्यानुसार महाऊर्जामार्फत लोकसंख्येनुसार जिल्हानिहाय उद्दिष्ट निश्चित करण्यात आले आहे. महाऊर्जामार्फत सद्यःस्थितीत सुमारे ७५ हजार ७७८ सौर कृषी पंप आस्थापित करण्यात आले आहेत.

खुल्या प्रवर्गातील शेतकऱ्यास दहा टक्के व अनुसूचित जाती, अनुसूचित जमाती प्रवर्गातील शेतकऱ्यास पाच टक्के लाभार्थी हिस्सा भरण्यासाठीचा एसएमएस पाठविला जातो. ही योजना राबविण्यासाठी स्वतंत्र ऑनलाइन पोर्टल विकसित केले आहे.

त्याद्वारे अर्जापासून ते कागदपत्रे अपलोड करणे, अर्जाची छाननी करणे, शेतकऱ्याना लाभार्थी हिस्सा भरण्यासाठी एसएमएस पाठवणे, लाभार्थी हिस्सा ऑनलाइन भरण्याची शेतकऱ्याना मुभा देण्यात आली आहे. पण राज्यात काही ठिकाणी शेतकऱ्यांना खोटे संदेश पाठवून लाभार्थी हिस्सा भरून घेऊन फसवणूक केल्याचे प्रकार उघडकीस आले आहेत.