Kolhapur News : जिल्ह्यातील साखर कारखाने, एमआयडीसी, महापालिका तसेच इचलकरंजी शहरातील प्रोसेस मधून थेट दूषित पाणी पंचगंगा व वारणा नदीत सोडण्यात येत असल्याने दोन्हीही नद्यांमधील पाणी प्रदूषित झाले असून संबंधितांवर तातडीने कारवाई करण्याची मागणी स्वाभिमानी शेतकरी संघटनेचे संस्थापक राजू शेट्टी यांनी जिल्हाधिकारी अमोल येडगे यांच्याकडे केली.

जिल्ह्यातील नद्यांच्या प्रदूषणात दिवसेंदिवस वाढ होत असून ही बाब जिल्हा प्रशासनाने गांभीर्याने घेणे गरजेचे आहे. प्रदूषण नियंत्रण मंडळातील अधिकारी जिल्ह्यातील प्रदूषण करणाऱ्या कारखान्यांवर कारवाई न करता केवळ कारवाईचा फार्स केला जात आहे.

विशेषतः जिल्ह्यातील अनेक साखर कारखान्यांकडून स्पेंट वॉश, मळीमिश्रीत पाणी थेट नदीमध्ये सोडले जात आहे. इचलकरंजी शहरातील अनेक प्रोसेस धारकाकडून केमिकलयुक्त पाणी थेट नदीमध्ये सोडले जात आहे.

नवीन नियमानुसार त्यांना झेडएलडी (झिरो लिक्विड डिस्चार्ज) प्रकल्प राबविण्यास सांगण्यात आले आहे. मात्र अनेक प्रोसेस धारकाकडून प्रकल्पाचा कमी डिस्चार्ज दाखवून जादा डिस्चार्ज सोडल्याने यावर कोणाचेच नियंत्रण राहिले नाही. जिल्ह्यातील नद्या प्रदूषणाबाबत प्रशासन व शासनाने गांभीर्याने घेणे गरजेचे असून कारवाईचा फार्स करून प्रदूषण महामंडळातील अधिकारी जिल्ह्यातील कारखानदाराकडून हप्ते गोळा करण्यापुरते मर्यादित राहिले आहेत.

ऐन उन्हाळ्यात नदी पात्रातील पाणी कमी होवू लागल्याने प्रदूषणाचा प्रश्न गंभीर होणार असून कावीळसारखे अनेक साथीचे आजार पसरण्याची शक्यता आहे. साखर कारखाने, एमआयडीसी, महापालिका तसेच इचलकरंजी शहरातील प्रोसेसमधून थेट केमिकलचे दूषित पाणी पंचगंगा नदीत सोडल्याने परिसरातील पिके, भाजीपाला व इतर घटकावर मोठा परिणाम झाला आहे. लेड, अल्काईन, फॉस्फरस यासारख्या केमिकलचे अंश पाणी, माती, भाजीपाल्यामध्ये आढळून आले असून या बाबत जिल्हाधिकारी यांनी गांभीर्याने उपाययोजना करणे गरजेचे आहे.