Agriculture News: काजू बी अनुदान योजनेला अर्ज करण्यासाठी मुदत वाढ देण्याचा निर्णय राज्य सरकारनं घेतला आहे. यापूर्वी ३१ ऑगस्ट २०२४ पर्यंत अर्ज करण्याची अंतिम मुदत देण्यात आली होती.

परंतु बहुतांश काजू उत्पादक शेतकऱ्यांनी अर्जाला मुदत वाढ देण्याची मागणी केली. त्यामुळे आता राज्य सरकारनं ३० सप्टेंबर २०२४ पर्यंत काजू बी अनुदान योजनेला अर्ज करण्यासाठी मुदत वाढ दिली आहे. शेतकऱ्यांना काजू बी अनुदानासाठी ३० सप्टेंबरपर्यंत अर्ज करता येणार आहे.

राज्य सरकारनं काजू उत्पादकांसाठी ही योजना सुरू करणीयचा निर्णय घेतला. तयासाठी नोडल एजन्सी म्हणून राज्य काजू मंडळाची नियुक्ती करण्यात आली. परंतु कोल्हापुर जिल्ह्यातील शेतकऱ्यांना ऑनलाईन अर्ज करताना अडचणीना सामना करावा लागला.

काजू उत्पादक शेतकरी काजू बी अनुदानापासून वंचित राहतील, अशी भीती शेतकऱ्यांमध्ये निर्माण झाली होती. काजू उत्पादक शेतकऱ्यांनी योजनेला मुदत वाढ देण्याची मागणी महाराष्ट्र काजू मंडळाचे संचालक परशराम पाटील यांच्या केली होती.

अखेर मंडळाने काजू बी अनुदानासाठी मुदत वाढ देण्याचा निर्णय घेतला. ज्या शेतकऱ्यांनी काजू बी अनुदानासाठी अर्ज केला नाही, अशी शेतकरीही आता अर्ज करू शकतात. अर्ज करताना काजू बी विक्री पावती, सातबारा उतारा, आधार संलग्न बचत बँक खाते क्रमांक तपशील आणि कृषी विभागायच्या अधिकाऱ्याचं प्रमाणपत्र देणं बंधनकारक आहे.

दरम्यान, राज्यात अंदाजे १.९१ लाख हेक्टर क्षेत्र आहे. राज्यात दरवर्षी १.८१ लाख टन काजू उत्पादित होतो. प्रामुख्याने कोकण आणि पश्चिम महाराष्ट्रात काजूचं उत्पादन घेतलं जातं. त्यामध्ये सिंधुदुर्ग, रायगड, रत्नागिरी, कोल्हापूर आणि पालघर या जिल्ह्यांचा समावेश होतो. तसेच राज्यातील काजूची हेक्टरी ९८२ किलो उत्पादकता आहे. त्यामुळे काजू उत्पादनात महाराष्ट्र अग्रेसर राज्य आहे. तर सिंधुदुर्ग येथील काजूला जीआय टॅगही मिळालेला आहे.