Nashik News: देशभरात द्राक्ष निर्यातीसाठी नाशिकची ओळख आहे. मात्र मागील वर्षीच्या तुलनेत नैसर्गिक आपत्तीमुळे २०२४-२५ हंगामात उत्पादनात ४० टक्क्यांपर्यंत घट दिसून आली. त्यामुळे युरोपियन व बिगर युरोपियन देशात मागील वर्षी झालेल्या एकूण निर्यातीच्या तुलनेत (१ एप्रिलअखेर) द्राक्ष निर्यात जवळपास ४० हजार टन कमी आहे. मात्र हंगाम सुरू असल्याने निर्यात वाढ अपेक्षित आहे.

कृषी विभागाच्या माहितीनुसार, महाराष्ट्राचा देशभरात द्राक्ष उत्पादनात पहिला क्रमांक लागतो. तर देशातील एकूण निर्यातीमध्ये नाशिकचा वाटा ९१ टक्के आहे. जिल्ह्यात १३ तालुक्यांत ५८ हजार ४१८ हेक्टर क्षेत्रावर द्राक्ष लागवडी आहेत. ज्यामध्ये प्रामुख्याने निफाड, दिंडोरी, नाशिक, चांदवड हे प्रमुख उत्पादक तालुके आहेत.

२०२४–२५ हंगाम शेतकऱ्यांसाठी आव्हानात्मक राहिला. सप्टेंबर व ऑक्टोबर महिन्यात गोडी बहर छाटणी दरम्यान व नंतर अतिवृष्टी तसेच मॉन्सूनोत्तर पावसामुळे द्राक्षपंढरीतील बागा अडचणीत सापडल्या. एकंदरीत हंगामात उत्पादन ४० टक्क्यांपर्यंत कमी आहे. तर सुरुवातीच्या टप्प्यात जानेवारी महिन्यात निर्यात सुरू झाल्यानंतर मालाची उपलब्धता तुलनेत कमी दिसून आली.

ग्रेपनेट प्रणालीत १३ तालुक्यांमध्ये द्राक्ष बागांची नोंदणी झाली. गेल्या वर्षीच्या तुलनेत यंदा ५०४ द्राक्ष बागा तर ३२३ हेक्टर क्षेत्र अधिक नोंदविले गेले. परंतु निसर्गाच्या अवकृपेमुळे निर्यातहंगामाच्या सुरुवातीलाच जानेवारीमध्ये द्राक्ष निर्यातीच्या कामकाजात अडथळे आले. युरोपातील नेदरलँड, जर्मनी, बेल्जियम, डेन्मार्क, यू.के., तर नॉन युरोपियन रशिया, तुर्की, चीन व आखाती देशांमध्ये निर्यात झाली आहे.

प्रामुख्याने सफेद वाणात थॉमसन सीडलेस, सोनाका, माणिक चमन, सुपर सोनाका तर रंगीत द्राक्ष वाणात शरद सीडलेस, क्रीमसन सीडलेस तर काही प्रमाणात रेडग्लोब या वाणांची निर्यात झाली आहे.

गेल्या वर्षीच्या तुलनेत निर्यात स्थिती :

हंगाम....२०२३-२४...२०२४-२५

युरोपियन देश...११८१९५.३४...९१४१७.१३

नॉन युरोपियन देश...३८७०९.८७...२६१८२

आर्थिक वर्ष...२०२०–२१...२०२१–२२...२०२२–२३...२०२३–२४...२०२४–२५

ग्रेपनेट प्रणाली द्राक्ष प्लॉट नोंदणी संख्या...३७५५७...३४२९५...३१९२३...२८४६०...२८९६५

द्राक्ष प्लॉट नोंदणी क्षेत्र (हेक्टर)...२४०५५...२१९५०...२०४३१...१८२१४...१८५३७

निर्यात (टन)...१२६९१२...१२२३३०...१५३४६५...१५६९०५...११७९९