Pune News : बांगलादेशमध्ये सुरू असलेल्या हिंसाचारामुळे भारत आणि बांगलादेशमध्ये सुरू असलेला व्यापार ठप्प झाला. कापूस, सूत, सोयाबीन, सोयापेंड, कांदा, टोमॅटो, भाजीपाला आणि फळे, मसाले, प्रक्रियायुक्त खाद्य पदार्थांची निर्यात थांबली आहे. सीमेवर शेतीमाल घेऊन ट्रक उभे आहेत. त्यामुळे निर्यातदार आणि शेतकऱ्यांचीही चिंता वाढली. शेतीमालाचा व्यापार लवकरच सुरू होईल, असे दोन्ही देशांमधील व्यापारी सांगत आहेत.

भारतातून शेतीमाल निर्याती करण्यात बांगलादेशचा मोठा वाटा आहे. शेजारी आणि वाहतूक सोईस्कर असल्याने भारताचा बांगलादेशसोबतचा व्यापार गेल्या काही वर्षांपासून चांगलाच वाढला. विशेष म्हणजे भारत आयातीपेक्षा बांगलादेशला निर्यात जास्त करतो. २०२३-२४ मध्ये भारताने एकूण १ हजार ११० कोटी डॉलरची निर्यात केली होती. तर १८० कोटी डॉलरची आयात केली होती. भारताच्या निर्यातीत शेतीमालाचा वाटा सर्वाधिक आहे.

भारताने २०२३-२४ मध्ये बांगलादेशला २४२ कोटी डॉलरची शेतीमाल आणि प्रक्रियायुक्त पदार्थांची निर्यात केली होती. कापड निर्यात २१५ कोटी डॉलरची होती. म्हणजेच बांगलादेशसोबतच्या व्यापारात शेती आणि शेतीशी संबंधित वस्तूंचा वाटा जास्त आहे. आयातीचा विचार केला तर भारत बांगलादेशातून कापड आणि तयार कपडे जास्त आयात करतो.

कापसावर काय परिणाम होणार?

भारतातून बांगलादेशला कच्चा कापूस आणि सुताची निर्यात होते. तर बांगलादेशातून तयार कापडाची आयात होते. पण बांगलादेशमधील हिंसाचारामुळे येथील कापड उद्योगही प्रभावित झाला. भारताच्या एकूण कच्च्या कापूस निर्यातीपैकी निम्मा कापूस बांगलादेशला निर्यात होत असतो. पण भारताचा हंगामातील जास्त निर्यातीचा काळ संपला. त्यामुळे बांगलादेशला मागील महिन्यापासून निर्यात कमी होत आहे.

परिणामी, कापूस बाजारावर बांगलादेशची मागणी कमी झाल्याचा परिणाम होणार नाही. तसेच बांगलादेशलाच भारताच्या कापसाची जास्त गरज असते. कारण भारताकडून पाहिजे तेवढ्या प्रमाणात आणि कमी वेळेत कापूस मागवता येतो. अमेरिका आणि ब्राझीलमधून जास्त कापूस मागवला तर परवडते. त्यामुळे बांगलादेश आयात खुली करेल, असे कापूस उद्योजक अविनाश काबरा यांनी सांगितले.

कांदा निर्यातीला अंशतः परवानगी

नाशिक : भारत-बांगलादेश सीमेवर थांबलेल्या कांदा निर्यातीला अखेर ३० तासांनंतर मंगळवारी (ता. ६) मध्यरात्री अंशतः परवानगी मिळाली आहे. कांद्याशिवाय फळे भाजीपाला यांची काही प्रमाणात निर्यात सुरू झाली आहे. मात्र यापूर्वी जारी झालेल्या लेटर ऑफ क्रेडिटच्या अनुषंगाने ही वाहने सोडण्यात आली आहे. नवीन मागणी व त्यासाठी नवीन लेटर ऑफ क्रेडिट निर्यातदारांना मिळालेले नाही. त्यामुळे तूर्त निर्यात ठप्प आहे. इंटरनेट सेवा अद्याप पूर्णतः सुरळीत नाही. तीन दिवसांत बँकिंग सेवा सुरळीत होऊन व्यवहार पूर्ववत होतील, असे बोलले जात आहे.