Ahilyanagar News : अहिल्यानगर जिल्ह्यात पोलिस व महसूल प्रशासनाचा गैरवापर केला जात आहे. कोणत्याही प्रकारची नोटीस न देता नागरिकांच्या मालमत्ता जमीनदोस्त करण्याचे काम सत्ताधाऱ्यांकडून करण्यात येत आहे, असा आरोप करत जिल्ह्यात सुरू असलेल्या अतिक्रमण पाडण्याच्या मोहिमेविरोधात लंके यांनी अक्रमक भूमिका घेतली. अहिल्यानगर जिल्ह्याचा बिहार झाल्याचा गंभीर आरोपही लंके यांनी केला.

अहिल्यानगर शहरासह जि्ल्ह्यातील अनेक मोठ्या गावांत प्रशासनाकडून अतिक्रमणे काढली जात आहेत. अतिक्रमणे काढताना कोणत्याही नोटिसा न देता प्रशासन अचानक अतिक्रमणे काढून लोकांवर अन्याय करत असल्याचे सांगत खासदार नीलेश लंके यांनी या विरोधात अक्रमक भूमिका घेत सत्ताधाऱ्यांवर निशाणा साधला.

पत्रकारांशी बोलताना खासदार लंके म्हणाले, की अहिल्यानगर जिल्ह्यात पोलिस, महसूल प्रशासनाचा वापर सत्ताधारी करत आहेत. नोटीस न देता सकाळी सात वाजता बुऱ्हाणनगर येथील अभिषेक भगत यांचे अडीच ते तीन कोटी रुपयांचे मंगल कार्यालय उद्ध्वस्त केले. नागरिकांचे म्हणणे ऐकूण न घेता आकसापोटी अतिक्रमण काढली जात आहेत.

अतिक्रमण आहे हे सिद्ध करून ती पाडण्याबाबत जिल्ह्यात गेल्या अनेक दिवसांपासून रचण्यात येत आहेत. भगत यांचे अतिक्रमण पाडताना एकीकडे आम्ही हिंदुत्वाचे काम करतो हे सांगायचे आणि दुसरीकडे २१०० वर्षांपूर्वीच्या पालखीची तोडफोड करायची असा सत्तेचा गैरवापर करण्यात येत आहे. अहिल्यानगर तालुक्यातील वडगाव गुप्ता येथे आदिवासी भिल्ल समाजाचे कुटुंबे ५० वर्षांपासून वास्तव्यास आहेत.

कायद्याचा दुरउपयोग करून या आदिवासी बांधवांच्या झोपड्या जमीनदोस्त करण्यात आल्या आहेत. अहिल्यानगर शहरातही महापालिका आयुक्तांकडून चुकीच्या कारवाया करण्यात येत आहेत. लोकांकडे उतारे असतानाही त्यांचे म्हणणे एकूण न घेता गाळे जमीनदोस्त करण्यात आले.

ज्या अधिकाऱ्यांनी राजकीय अकासापोटी या कारवाया केल्या आहेत त्यांच्यावर कारवाई झाली पाहिजे. हे सर्व थांबले पाहिजे. राजकारण सुरू राहील. सत्ता आज ना उद्या येईल. अधिकाऱ्यांनी सत्ताधारी व विरोधकांमध्ये समतोल ठेवला पाहिजे. या वेळी लंके यांनी जिल्हाधिकाऱ्यांची भेट घेऊन कैफियत मांडली.