Parbhani News : दरडोई प्रथिनांची गरज पूर्ण करण्यासाठी अंडी व मांस उत्पादन वाढवावे लागेल. त्यासाठी शेळी व परसातील कुक्कुटपालन हे व्यवसाय वृद्धिंगत करावे लागतील, असे प्रतिपादन नागपूर येथील महाराष्ट्र पशू व मत्स्य विज्ञान विद्यापीठाचे विस्तार शिक्षण संचालक डॉ. अनिल भिकाने यांनी केले.

जागतिक बँक अर्थसाह्यित स्व. बाळासाहेब ठाकरे कृषी व्यवसाय व ग्रामीण परिवर्तन प्रकल्प (स्मार्ट), पशुसंवर्धन विभाग व महाराष्ट्र पशू व मत्स्य विज्ञान विद्यापीठ यांच्या संयुक्त विद्यमाने शेळी व कुक्कुटपालन सुधारण्यासाठी पशुसखींचे कौशल्य वृद्धी प्रशिक्षण कार्यक्रम याअंतर्गत शेळी व परसातील कुक्कुटपालन या विषयावर पशुसखींचे पहिले पंधरादिवसीय निवासी प्रशिक्षणाचा समारोप मंगळवारी (ता. ६) पशुवैद्यकीय महाविद्यालयात झाला.

या वेळी डॉ. भिकाने ऑनलाइन उपस्थित होते. अध्यक्षस्थानी पशुवैद्यक व पशुविज्ञान महाविद्यालयाचे सहयोगी अधिष्ठाता डॉ. बाबासाहेब नरळदकर होते. प्रकल्प सहसमन्वयक डॉ. सुनीत वानखेडे, डॉ. प्रल्हाद वानखेडे, प्रशिक्षण सहसमन्वयक डॉ. अनिता चप्पलवार, डॉ. साजिद अली यांची उपस्थिती होती. आयुक्त पशुसंवर्धन आयुक्तलयातील स्मार्ट प्रकल्पाचे नोडल अधिकारी डॉ. कल्पना करगावकर यांची ऑनलाइन उपस्थिती होती.

डॉ. भिकाने म्हणाले, की स्व. बाळासाहेब ठाकरे कृषी व्यवसाय व ग्रामीण परिवर्तन प्रकल्प (स्मार्ट) अंतर्गत राज्यातील शेतकरी उत्पादक कंपन्यांतर्गत ७०० महिला संचालक, सभासदाना राज्यातील ६ पशुवैद्यक महाविद्यालयाद्वारे पशुसखींचे प्रशिक्षण देण्याचे उद्दिष्ट आहे.

त्यातून शेतकरी उत्पादक कंपन्या बळकट होतील. ग्रामीण भागाच्या प्रगतीस मदत होईल. या वेळी शेळी आणि परसातील कुक्कुटपालन या पुस्तकाचे प्रकाशन करण्यात आले. पशुधनांवरील प्रथमोचारासाठी किटचे वाटप पशुसखींना करण्यात आले. प्रास्ताविक डॉ. वानखेडे यांनी केले.