Alibaug Agriculture News : कोकणातील भातशेती आर्थिकदृष्ट्या परवडत नाही तर आंबा, काजू लागवडीतही निश्चित उत्पन्नाची शाश्‍वती नाही. त्‍यामुळे नुकसान न होणाऱ्या नारळ आणि सुपारी लागवडीकडे शेतकऱ्यांचा कल वाढला आहे.

कमी जागेत अनेक झाडे लावून दोन हंगामात पीक येत असल्‍याने सुपारीचे पीक रायगडमधील शेतकऱ्यांना मुख्य आधार ठरत आहे.

निसर्ग आणि तौक्ते चक्रीवादळात रायगड जिल्ह्यातील सुपारीच्या बागांना मोठा तडाखा बसला. दोन वर्षे कृषी विभागाने सुपारी लागवडीवर भर दिल्यानंतर सुपारीच्या झाडांच्या संख्येत वाढ आहे. त्यातच दिवेआगरच्या रोठा सुपारीच्या झाडांमध्ये लक्षणीय वाढ झाली आहे.

दिवेआगर परिसरात तयार होणाऱ्या रोठा सुपारीला मागणी दिवसेंदिवस वाढत आहे. याचबरोबर श्रीवर्धन येथील सुपारी संशोधन केंद्राचे या पिकाच्या संदर्भात संशोधन सुरू असते. या केंद्राकडून सुपारीच्या नवनव्या जातींचा शोध घेतला जात आहे.

या जाती कमी कालावधीत जास्त उत्पादन देणाऱ्या आहेत. सध्या गावठी सुपारीचा दर ४५० रुपये इतका वधारला आहे. सहकार तत्त्वावर चालणाऱ्या सुपारी संघाकडूनही सुपारीची खरेदी केली जाते. पाच वर्षांत सातत्याने दरवाढ होत असल्याने बागायतदारांनी सुपारी लागवडीचा पर्याय स्वीकारला आहे.

रोठा सुपारीची ख्याती शेजारच्या बांगलादेश, श्रीलंका, पाकिस्तानमध्येही पसरली आहे. भारतात केरळ आणि कोकणात सुपारीचे उत्पादन घेतले जाते, हे उत्पादन मागणीपेक्षा कमी असल्याने सुपारीला दिवसेंदिवस मागणी वाढत असल्याचे सुपारी बागायतदारांचे म्हणणे आहे.

सुपारी बागांवर औषध फवारणी केल्यास रोग प्रादुर्भाव कमी होतो. यावर संशोधन होत असल्याने सुपारी बागायतदारांना दिलासा मिळाला.