Mumbai News : विधान परिषदेवर निवडून आलेल्या ११ आमदारांना रविवारी (ता. २८) विधान भवनात शपथ देण्यात आली. विधान परिषदेच्या उपसभापती नीलम गोऱ्हे यांनी मध्यवर्ती सभागृहात नवनिर्वाचित आमदारांना शपथ दिली.

विधान परिषदेवर निवडून आलेल्या ११ आमदारांची नावे राजपत्रात प्रसिद्ध झाल्यानंतर त्यांना शपथ देण्यात आली. भाजपच्या नेत्या पंकजा मुंडे यांचा पराभव झाल्यानंतर आणि भावना गवळी व कृपाल तुमाने यांना तिकीट नाकारल्यानंतर त्यांना विधान परिषदेवर संधी देण्यात आली.

राष्ट्रवादी काँग्रेसच्या अजित पवार गटाचे शिवाजीराव गर्जे, योगेश टिळेकर यांचाही विजय झाल्याने त्यांना शपथ देण्यात आली. उपसभापती गोऱ्हे यांनी सर्व आमदारांचे पुष्पगुच्छ देऊन स्वागत केले. त्यानंतर पंकजा मुंडे, सदाशिव खोत, परिणय फुके, अमित गोरखे, भावना गवळी, कृपाल तुमाने, योगेश टिळेकर,

प्रज्ञा सातव, शिवाजीराव गर्जे, राजेश टिळेकर आणि शिवसेनेचे मिलिंद नार्वेकर यांना शपथ देण्यात आली. भाजपने सर्व्हे दाखवून तिकीट नाकारलेल्या भावना गवळी आणि कृपाल तुमाने यांचे राजकीय पुनर्वसन केल्यानंतर शिंदे गटात उत्साह संचारला आहे.

रविवारी शपथ घेतल्यानंतर गवळी यांनी ‘जय महाराष्ट्र, जय एकनाथ’ अशी घोषणा देत कृतज्ञता व्यक्त केली. या वेळी विधान परिषदेचे विरोधी पक्षनेते अंबादास दानवे, विधानमंडळ सचिवालयाचे सचिव जितेंद्र भोळे, विलास आठवले आदी उपस्थित होते.