Ahilyanagar News: राज्यात लहान, मध्यम व मोठे असे एकूण सुमारे २९९७ इतकी धरणे आहेत. यंदा ७ ऑगस्ट २०२५ पर्यंत राज्यातील सर्व धरणांमध्ये ७२.७० टक्के (१०४०.०७६ टीएमसी) इतका उपयुक्त पाणीसाठा झाला आहे. गेल्या वर्षी या दिवसापर्यंत सर्व धरणांत सुमारे ६५.०७ टक्के म्हणजेच ९३०.९२० टीएमसी साठा होता. या वर्षी सुमारे ८ टक्के उपयुक्त पाणीसाठा अधिक आहे, अशी माहिती जलसंपदा विभागातील सेवानिवृत्त अभियंता हरिश्‍चंद्र चकोर यांनी दिली.

राज्यातील बहुतांश भागात यंदा मे महिन्यात जोरदार पाऊस झाला. इतर ठिकाणी खंड पडला तरी घाटमाथ्यावर जून व जुलै महिन्यांतही बऱ्यापैकी पाऊस झाला. त्यामुळे राज्यभरातील धरणांत बऱ्यापैकी पाणीसाठा झाला आहे.

कोकण विभागात एकूण १७३ धरणे असून त्यामध्ये १११.२७० टीएमसी (८५ टक्के) उपयुक्त पाणीसाठा झाला आहे. नाशिक विभागात ५३७ इतकी लहान, मध्यम व मोठी धरणे असून त्यात १४२.४९१ टीएमसी (६७.९७ टक्के) इतका उपयुक्त पाणीसाठा झाला आहे. तर, पुणे विभागात एकूण ७२० धरणे असून त्यामध्ये ४४४.९७२ टीएमसी (८२.८५ टक्के) उपयुक्त साठा झाला आहे.

मराठवाडा विभागामध्ये ९२० धरणे असून त्यामध्ये १५२.९९६ टीएमसी (५९.६७ टक्के) उपयुक्त साठा आहे. अमरावती विभागामध्ये २६४ धरणे असून त्यामध्ये ८४.३७ टीएमसी (६१.१८ टक्के) नागपूर विभागात ३८३ धरणे असून या धरणांमध्ये १०४.७०४ टीएमसी (६३.८५ टक्के) उपयुक्त साठा झाला आहे.

राज्यातील एकूण साठ्याचा विचार केला तर सर्वाधिक पाणीसाठा कोकण विभागात (८५ टक्के), त्या खालोखाल पुणे विभागात (८२.८५ टक्के) साठा झालेला असून, सर्वांत कमी साठा मराठवाडा विभागात (५९.६७ टक्के) आहे.

प्रमुख धरणातील पाणीसाठा

- उजनी धरण : ११६.४०० टीएमसी ( ९९.२८ टक्के)

- कोयना धरण : ८७.४५० टीएमसी (८३.०८ टक्के)

- जायकवाडी धरण : ९६.३९० टीएमसी (९३.८३ टक्के)