Radhanagari Dam : कोल्हापुरात जोरदार पाऊस,'राधानगरी'चे चार दरवाजे उघडले

Kolhapur News : जिल्ह्यातील राधानगरी धरण पूर्ण क्षमतेने भरले असल्याने, पाण्याचा विसर्ग नियंत्रित करण्यासाठी हे दरवाजे उघडण्यात आले आहेत. शुक्रवारी (ता. २५ ) रात्रीपासून धरणाचे दरवाजे उघडण्यास सुरुवात झाली आणि शनिवारी (ता. २६) पहाटेपर्यंत चार दरवाजे खुले झाले आहेत.

सध्या धरणातून मोठ्या प्रमाणात पाण्याचा विसर्ग भोगावती नदीत सोडला जात आहे. यामुळे भोगावती नदीसह पंचगंगा नदीच्या पाणीपातळीत वाढ होण्याची शक्यता आहे. प्रशासनाने नदीकाठच्या गावांना सतर्कतेचा इशारा दिला असून, नागरिकांना सुरक्षित ठिकाणी राहण्याचे आवाहन केले आहे. वारणा धरणांतून १० हजार २६० क्यूसेक पाण्याचा विसर्ग सुरु आहे. शनिवारी दुपारपर्यंत विविध नद्यांवरील ४५ बंधारे पाण्याखाली गेले.

गेल्या चार दिवसांपासून विश्रांती दिलेल्या पावसाने जिल्ह्यात जोरदार हजेरी लावली. शहरात हलक्या सरी कोसळल्या, तर गेल्या चोवीस धरण क्षेत्रात अतिवृष्टी झाली. यामुळे नद्यांच्या पाणी पातळी झपाट्याने वाढ झाली. पंचगंगा नदीच्या पाणी पातळीत दिवसभरात तब्बल अडीच फूट वाढ झाली. दरम्यान, अद्याप आठ बंधारे पाण्याखाली आहेत. शुक्रवारी रात्रीपासून अचानक पावसाच्या जोरदार सरी जिल्ह्यात सर्वत्र कोसळल्या.

धरण क्षेत्रांत गेल्या चोवीस तासांत अतिवृष्टी झाली. यामध्ये कुंभी, घटप्रभा, पाटगाव, कासारी, धामणी, कोदे आदी धरण क्षेत्रांत ६५ मि.मी.पेक्षा जास्त पाऊस पडला. यामुळे नद्यांच्या पातळीत मोठ्या प्रमाणात वाढ झाली. सकाळी १८ फूट असणारी पंचगंगेची पाणी पातळी रात्री २८ फूट सहा इंचांवर पोहोचली.

आलमट्टी धरण ८०.९३ टक्के धरण भरले असून, त्यातून ४२ हजार ५०० क्युसेक विसर्ग सुरू आहे, तर कोयना धरण ७२.८१ टक्के भरले असून, २० हजार ९०० क्युसेक विसर्ग सुरू आहे. पावसामुळे एका घराची भिंत कोसळून ३० हजारांचे नुकसान झाले. जिल्ह्यात आतापर्यंत ४१४ मालमत्तांचे सुमारे एक कोटी ५१ लाख १५ हजार ९५० रुपयांचे नुकसान झाले.