Yavatmal News : ढगाळ वातावरण व सकाळी पडत असलेल्या दवबिंदूंचा हरभरा पिकांवर परिणाम होण्याची शक्यता आहे. हे किडीसाठी पोषक वातावरण असल्याने कीटकांचे प्रजनन वाढण्याचा धोका असून खरिपानंतर रब्बीतील पीकावरही संक्रांत येण्याची शक्यता कृषी तज्ज्ञांकडून वर्तविली जात आहे.

जिल्ह्यात गेल्या काही दिवसांपासून वातावरणात कमी कालावधीत बदल होत आहे. अचानक तापमानात वाढ होत असून लगेच तापमान खाली जात आहे. यामुळे अशावेळी हरभरा पिकांवर अळीचा प्रादुर्भाव वाढण्याचा धोका वाढला आहे.

अतिवृष्टी तसेच सततच्या पावसाने खरिपातील सोयाबीन व कापसाचे मोठे नुकसान झाले. जास्त पावसाने तूर जळाल्याने उत्पन्नात घट झाली आहे. अशातच आता गरम, थंडीमुळे पुन्हा हरभरा अडचणीत सापडला आहे. ढगाळ वातावरणाने किडीसाठी पोषक वातावरण तयार झाले आहे. या काळात किडीचे प्रजनन वाढण्याची शक्यता आहे.

परिणामी, हरभरा पिकांवर किडीच्या आक्रमणाचा धोका वाढला आहे. एकामागून एक येत असलेल्या संकटांमुळे शेतकरी अडचणीत येत आहे. खरीप हंगामानंतर आता रब्बीतही शेतकऱ्यांपुढे पीक वाचविण्याची मोठी कसरत करावी लागणार असल्याचे दिसून येत आहे. खरीप हंगामात कापूस, सोयाबीनचे उत्पन्न मोठ्या प्रमाणात घटले आहे.